Проширувањето ќе биде во фокусот на данското претседавање со Европската Унија, кое стартува на 1 јули, бидејќи актуелните геополитички случувања уште повеќе го актуализираат овој процес, а ние ќе сториме се што е во можност за да го поттикнеме евроинтегрирањето на земјата, но тој пат мора да се изоди заеднички, со цел да се види дали може да се постигне напредок и во кои делови тоа може да се реализира, порача данската министерка за европски прашања, Мари Бјере која денеска е во посета на Скопје.
Бјере на заедничката прес-конференција со министерот за европски прашања, Орхан Муртезани на прашањето што конкретно би сторила Данска, како иден претседавач на Унијата, во однос на интегрирањето на Македонија во ЕУ, имајќи го предвид спорот со Бугарија, но и иницијативата од претседателот на Европскиот совет, Антонио Кошта за средба на македонски и бугарски високи претставници на маргините на Самитот во Хаг, која сè уште не е извесна, не даде конкретен одговор, но посочи дека моментумот за проширување е тука и оти земјата треба да го зграпчи.
– Моментумот за проширување апсолутно е тука и веќе сме негови сведоци, направен е прогрес и за Украина и за Молдавија, и сега со Албанија отвораме два нови кластери, еден сега, еден на есен, исто така имаме напредок и кај Црна Гора, кој не се случуваше долго време. Искрено да кажам дека моментумот е тука и ве молам да го зграпчите. И сега со нашето претстојно претседателство со ЕУ морам да ви кажам дека ние не можеме самостојно ова да го туркаме, ние сме тука конструктивно да работиме со вас, со Северна Македонија за да можеме заеднички да видиме каде можеме да постигнеме напредок, во кои делови можеме да го оствариме напредокот – истакна данската министерка, додавајќи дека е видливо дека земјава има остварено голем напредок на патот до ЕУ.
Таа во своето обраќање на заедничката прес-конференција истакна дека причината за нејзината посета е претстојното претседавање со ЕУ, кое го презема Данска и оти со Муртезани разговарале за актуелните политички прашања.
Данската министерка истакна дека со оглед на актуелните геополитички случувања, руската агресија врз Украина, но и, како што посочи, новите ветришта, кои дуваат од САД, Европа треба да биде силен геополитички актер, а за да се одбрани себеси во овие новонастаните околности, клучен е процесот на проширување.
-Затоа што зборуваме за една поголема Европа, која во исто време ќе биде посилна Европа. Затоа ние се стремиме да го задржиме овој процес на проширување и знаеме дека Северна Македонија е земја-кандидат речиси 20 години, така што сега е времето да го фатите овој чекор повторно. Свесни сме дека имаше еден замор од проширувањето, но тој се појави и во вашата и во нашата земја и затоа сакаме повторно да работиме на проширувањето, да работиме и со Украина и со Молдавија, но и со земјите од Западен Балкан. Сметам дека сето ова ќе донесе просперитет за овие земји, полза и за нив и за вашата земја, но и за Европа – истакна Бјере.
Таа посочи дека Европа ќе биде посилна доколку е заедно со земјава, но и со другите држави од регионот и додаде дека има еден нов напредок во процесот на проширување и затоа е тука во Скопје за да и даде поддршка на државата.
-Секако тој напредок треба да биде заснован на спроведени реформи, на сите оние барања кои треба да ги испорачате и ние сме тука за да ви помогнеме и се надеваме дека во текот на нашето претседателство ќе можеме заеднички да работиме да го постигнеме ова затоа што сакаме да го поплочиме патот на Северна Македонија до ЕУ – истакна Бјере.
