Две лица загинаа, а едно лице е тешко повредено во сообраќајка што денеска напладне се случи на магистралниот патен правец А3 што го поврзува Битола и Прилеп.
„Во несреќата на влезот во Битола, учествувале камион и патничко моторно возило и притоа во директниот судир, на самото место животот го загубиле едно лице жител на градот Скопје и едно лице-странски државјанин, додека повреденото лице, исто така странски државјанин, е итно пренесено на лекување во ЈЗУ Клиничка болница-Битола“, велат од полицијата.
Екипи на СВР Битола и Јавен обвинител се на терен и ги истражуваат причините за несреќата, а сообраќајот се пренасочува по регионалниот пат Битола-Прилеп.
