Директорот на ЈЗУ Психијатриска болница Демир Хисар Жан Лозановски, директно дискриминирал и вознемирувал вработена докторка во болницата врз основа на политичко уверување, утврди Комисијата за спречување и заштита од дискриминација. Докторката е специјалист примариус и има две и пол години до пензија. Економистот од движењето ЗНАМ Жан Лозановски, кој раководи со оваа јавна психијатриска установа, впрочем, прво ја деградирал па ја вратил да биде раководителка на оддел во болницата, но тоа сепак не ја менува одлуката на Комисијата која се однесува на меѓупериодот. Вознемирувачката претставка до Комисијата ја упатила докторката која навела дека неколку пати писмено барала директорот да престане да ја дискриминира и да ја вознемирува на работното место, но наместо да се случи тоа, директорот ги охрабрил и поттикнал нејзините колеги и ги искористил нивните изјави против неа токму за спротивното. Таа до доаѓањето на новата власт била директор на болницата и член на Управниот одбор, ама по менувањето на власта била деградирана на ново работно место без никаква причина.
Прераспределувањето е несоодветно за мојата стручност, односно работната позиција не е за примариус и за некој што има докторат. Прераспределувањето беше направено поради економски причини, односно бев прогласена за технолошки вишок, додека на претходното мое работно место беше поставен доктор со пониско образование од моето. Поради недостиг на доктори психијатри, директорот воведе дежурства наместо смени, а јас бев прогласена за технолошки вишок. Во неколку наврати разговарав со директорот и го прашав за причината поради која сум прераспределена, на што тој ми одговори дека така му било кажувано во партија, дека имало политичка позадина, навела докторката во претставката до Комисијата за спречување и заштита од дискриминација.
Во решението за прераспределување пак, наведено било нешто сосема друго – дека докторката наводно го кршела работниот ред и дисциплина.
-Директорот ми рече дека морал така да напише, за да не сум го тужела – навела докторката во претставката до Комисијата.
Таа тврдела дека во неколку наврати била опоменувана да ја повлече претставката што ја поднела до Комисијата за спречување дискриминација, со закана дека во спротивно ќе биде исклучена од дежурства во болницата и ќе „падне“ од 8 дежурства месечно на две. Во јануари токму тоа и се случило – ѝ биле доделени само две дежурства и не ѝ бил доделен ниеден празник како работен ден. Дежурствата што требало да ѝ бидат доделени нејзе, ги добиле интернист и општи лекари кои немале лиценца да работат како психијатри. Со тоа, таа наведува дека била драстична разликата меѓу неа и другите вработени на кои им „припаднале“ дежурствата што нејзе ѝ биле одземени.
-Со тоа директорот кон мене изврши неправда, понижување, деградирање, ме спречи да напредувам во мојата струка и да работам во областа во која имам универзитетска диплома. Ми беше нанесена и материјална штета. Директорот на колегиум го прочитал моето барање да не бидам исклучена од дежурства и ја презентирал неговата одлука по што на присутните им рекол: Сега ќе ја исклучам од дежурства. Не сакаше да изгуби 7 илјади денари, сега нека изгуби повеќе па да видам дали ќе ја повлече тужбата, пишува докторката во својата претставка. Оваа реченица ми беше упатена директно и на мене. Сето ова пред сведоци – вели таа.
Лекарите од колегиумот, заедно со директорот почнале да држат состаноци на колегиум на кои не е присутна докторката, а на нив да ги носат и деградирачките одлуки за нејзината кариера и примања. На нејзиното претходно место како раководителка од кое била деградирана, без оглас биле поставени луѓе што не ги исполнуваат условите бидејќи немале доволно стаж, ниту сертификат за странски јазик. Кога Комисијата за спречување и заштита од дискриминација побарала од директорот Жан Лозановски да се произнесе по претставката, тој одговорил дека докторката била прераспределена од раководителка на оддел во доктор специјалист, платата не ѝ била намалена, а прераспределбата била поради усни и писмени поплаки против неа од вработени во болницата и пациенти. Меѓутоа, кога Комисијата почнала писмено по службена должност да бара фотокопии од поплаките од пациентите и вработените, да прашува дали бил објавен интерен оглас за раководител на местото од кое била деградирана подносителката, кои биле условите за избор на тој оглас – тогаш Лозановски не само што не ги испратил бараните информации до Комисијата за спречување и заштита од дискриминацијата, туку им посочил дека – докторката ја вратил на старото работно место раководител!
На 13 март 2025 до Комисијата од страна на директорот на ЈЗУ Психијатриска болница Демир Хисар, Жан Лозановски, беше доставен одговор на барањето. Наведено е дека вработената докторка била вратена на старото работно место – раководител на оддел од болницата. Бараните информации не беа доставени до Комисијата, пишува во јавната одлука.
Комисијата за спречување и заштита од дискриминација утврди дека Жан Лозановски директно ја дискриминирал и вознемирувал докторката врз основа на политичко уверување во областа на работата и работните односи.
Директорот не ги поби наводите од претставката и не докажа дека преземените дејства кон докторката биле засновани на објективни, оправдани и професионални причини. Не беа доставени писмени поплаки кои наводно служеле како основа за нејзиното прераспределување, ниту беше образложено зошто само на неа ѝ биле намалени дежурствата а на другите вработени им биле зголемени.
Не беше дадено образложение врз основа на кои критериуми биле избрани кандидатите за нејзиното претходно работно место и дали ги исполнувале условите за раководител на оддел во болницата. Не беа побиени наводите во претставката дека директорот ѝ се обратил со изјави кои упатуваат на нееднакво постапување врз основа на нејзиното политичко уверување, констатира Комисијата во одлуката.
Во неа се додава дека несомнено прераспределувањето на докторката од раководител во специјалист, а поставувањето за раководители на луѓе што не ги исполнувале условите за тоа, заедно со намалувањето на примањата за докторката преку нејзино исклучување од дежурства и изложување на изјави со политичка содржина, резултирало со повреда на нејзиното достоинство и создавање на непријателска работна средина. Дополнително, со намалувањето на примањата се загрозува економската стабилност на докторката, бидејќи се работи за лице во последните години од својот професионален ангажман пред да се пензионира.
И покрај тоа што таа е вратена на нејзиното претходно работно место раководител, повредата сепак постои за периодот во кој била прераспределена, се до денот на враќањето на нејзината претходна работна позиција бидејќи во тој период таа била изложена на нееднаков третман. Се препорачува во иднина директорот на ЈЗУ Психијатриска болница Демир Хисар Жан Лозановски да се воздржува од преземање било какви дејства или одлуки кои би можеле да резултираат со дискриминаторски третман, вознемирување или неповолно постапување врз основа на политичко уверување и да обезбеди еднаков и правичен третман на сите вработени. Во спротивно Комисијата пред суд ќе побара поведување прекршочна постапка против него, заклучува Комисијата за спречување од дискриминација.
Изминатите денови во јавноста се актуелизира децениската лоша состојба во оваа психијатриска болница во поглед на хигиената и условите која никако да се подобри. Дополнително, пред 2 недели, за време на транспорт од Психијатриската болница Демир Хисар до кривичниот суд во Прилеп, избега лицето А.Ј. Потоа тоа лице, вооружено со пиштол „берета“ влезе во Центарот за социјални работи Прилеп, застрела социјална работничка и се обиде да го убие директорот на Центарот за социјални работи. Стануваше збор за лице кое претходно било осудувано за насилен криминал – телесна повреда, загрозување на сигурноста, демнење и други кривични дела.
