Кочанското обвинителство отвори истрага за вкупно 34 лица, од кои седуммина се полицајци, а три се правни лица. Осомничени се дека во периодот од 2012 година, кога првпат почнала да функционира „дискотеката на смртта“, со верижни пропусти и незаконити дејствија воопшто не постапиле според прописите за заштита и се одговорни дека на 16 март во пожар во дискотеката „Пулс“ во Кочани изгореа 59 лица, меѓу кои и шест малолетни, а со тешки повреди се уште 197 лица од кои 25 деца. Ова го соопшти и републичкиот јавен обвинител Љупчо Коцевски, кој кажа дека за цел период Општината примала уплати врз основа на надоместок за угостителски објект. На денот на трагедијата, сопственикот, потоа продавачот на влезници и обезбедувањето, според Обвинителството, овозможиле во дискотеката таа вечер да влезат околу 650 посетители, помеѓу кои имало најмалку 31 дете.
– Еден од осомничените продавал билети без да води сметка за бројот и возраста на гостите што смеат да присуствуваат, спротивно на Законот за угостителска дејност, овозможувајќи влез и присуство и на малолетни лица на настанот. Тие не спречиле во дискотеката да се внесат пиротехнички фонтани што беа употребени на настапот, иако за тоа дејствие немале задолжителна дозвола издадена од надлежни органи за да ракуваат со пиротехнички средства, ниту просторните услови дозволувале употреба на такви пиротехнички средства – соопшти Коцевски.
За внесување и употреба на пиротехничките средства е осомничен и еден член на групата ДНК. Меѓу уапсените е и сопственикот и управител на фирмата за обезбедување од Скопје, како и овластеното лице на подружницата на оваа фирма во Кочани. Неофицијално, станува збор за Агенцијата за обезбедување „Рубикон“.
– Постои сомнение дека членовите на бендот околу 2:32 часот, како дел од сценскиот настап и ефект ги активирале експлозивните материи – пиротехнички фонтани што исфрлале искри во правец на плафонот над сцената, од кои веднаш се опожарил кровниот дел од објектот и пожарот се проширил по целиот објект. Во однос на пропустите на обезбедувањето, осомничени се сопственикот и управител на фирмата за обезбедување од Скопје, овластеното лице на подружницата во Кочани, тројца вработени и едно лице што не било вработено во фирмата, но вршело одредени работи за таа фирма. Сите тие вршеле работи на физичко обезбедување, без каква било претходна безбедносна процена и план за обезбедување, без да ги проверат условите за противпожарна заштита и опасност од пожари, како и другите сигурносни услови, особено во однос на опасности и можности за евакуација. Во текот на критичната вечер, не контролирале и овозможиле влез на деца во објектот, не воделе грижа за преполнетоста на капацитетот и не спречиле внес и користење експлозивни материи -пиротехнички средства со кои бил предизвикан пожарот и поради кои настанала несреќата во објектот – изјави Коцевски.
Првоосомничен е Дејан Јованов Деко, кој е закупец на објектот каде што е лоциран клубот, реален сопственик и носител на целата дејност. Заедно со него се осомничени и две други одговорни лица, сосопственици или управители во извесен период во правното лице, чија подружница е клубот, односно на компанијата „ММММ кафе“.
Основниот проект изготвен уште во 2010 година
Според Обвинителството, Јованов за фалсификуваната лиценца му дал пари на вработен во Министерството за економија за да му издаде лиценца за период од 13 февруари 2024 година до 13 февруари 2025 година за кабаре, иако не ги исполнувал условите. Основниот проект како услов за отпочнување со работа на каберето на Јованов, му го изготвила сопственичка и управителка на осомничено правно лице од Кочани уште во 2010 година. На барање на осомничениот сопственик, иако знаела дека не постоеле законски услови објектот да биде пренаменет од категорија лесна индустрија во објект што врши угостителска дејност кабаре, сепак му изготвила проект и со него сопственикот од 2012 година до 2023 година во континуитет добивал лиценци за вршење угостителска дејност. Во 2023 година тој ѝ се обратил на осомничената за да изврши корекција на основниот проект, а таа, без да изврши проверки на терен, незаконски извршила промена на правните лица во основниот проект и со тоа овозможила кабарето да поднесува барања за лиценца.
– Од Министерството за економија до овој момент се осомничени поранешен министер, но и поранешен државен секретар, раководител на сектор, раководител на Одделение и помлад соработник, кои и во моментов работат во Министерството, но на други раководни позиции. Сите тие со неизвршување на своите службени должности што биле правно должни да ги извршат, не постапиле според прописите и техничките правила за мерките за заштита и на осомниченото правно лице кое не ги исполнувало пропишаните услови и начин за вршење угостителска дејност, во повеќе наврати со лиценци му овозможиле вршење угостителска дејност – рече Коцевски.
Осомничени се и двајца поранешни директори на Државниот пазарен инспекторат и тројца инспектори затоа што ниту еднаш од 2020 до трагедијата не влегле и не извршиле контрола на нелегалната дискотека за да утврдат дали има важечка лиценца, дали ги исполнува пријавените минимално-технички услови, наведени во барањето за лиценца за кабаре и другите пропишани услови според закон.
Приведени и тројца градоначалници на Кочани
Тројца градоначалници – Ратко Димитровски, Николчо Илијевски и Љупчо Папазов – кои го воделе Кочани во периодот додека функционирала „дискотеката на смртта“, ја надополнија листата на осомничени што биле дел од корумпираниот систем што уби 59 млади луѓе. Во нивно време, дискотеката што надлежните ја нарекоа „шупа“, од 2012 година функционирала непречено и никој од нив не ја затворил.
По трагедијата се цитираа многу правила и прописи што не ги почитувала дискотеката, но и без да се знаат законите, во градот сите знаеле за клубот, сите полицајци, не само од градот, сите вработени по општинските институции што требало да ги спроведуваат законите и „големците“ од сите партии. Градоначалниците по дефиниција треба да знаат кои угостителски објекти на нивната територија имаат дозвола за работа, особено објектите од типот на кабареа, како „Пулс“ во конкретниот случај, а угостителот е должен пред да почне со работа да ги извести и Државниот пазарен инспекторат и општината.
Димитровски ја водел Општината од 2009 до 2017 година, а пред да биде приведен завчеравечер, сподели податок, според кој во времето кога тој бил градоначалник, Општина Кочани до Државниот пазарен инспекторат упатила барање за неиздавање лиценца за дискотека на Дејан Јованов ДОО Класик ДМ. Димитровски е бизнисмен и сопственик на печатницата „Европа 92“, а беше еден од осомничените и во случајот „Поштенска банка“. Тој во политиката е долги години – од 2008 до 2012 година беше пратеник, но беше и меѓу донаторите на ВМРО-ДПМНЕ. Неговата фирма во времето кога премиер беше Никола Груевски доби неколку државни тендери, меѓу кои и тој за „1.050 книги“. Само во периодот од 2013 до 2017 година, печатницата „Европа 92“ чиј и управител бил Димитровски, склучила договори во вредност од над 700.000 евра. Димитровски на чело на Општината во 2017 година беше наследен од Николчо Илијев, предложен од коалицијата што ја предводеше СДСМ. И Илијев е приватен стопанственик, основач и управител на текстилната компанија „ИНТ“ од Кочани, а бил раководител и на неколку претпријатија, меѓу кои и на Винка АД Виница. Папазов, кој поднесе оставка по катастрофата во „Пулс“, исто така имал фирми. Како заеднички имот пријавил и друштво за ограничена одговорност – ДОО „Флакда“, а на име на децата – Друштво ДООЕЛ „Фламинго“.
Полицијацие во притвор, началниците на слобода
Иако во притвор завршија седуммина полицајци, одговорност сè уште нема за седумтемина началници што ги разреши министерот за внатрешни работи, Панче Тошковски. Засега Тошковски не гледа вина кај нив, иако кажа дека полицајците што биле вечерта во дискотеката спроведувале оперативен план, односно биле во лов на малолетници.
– Ниту началникот на ОВР Кочани, ниту началникот на СВР Штип не се дел од лицата што биле предмет на распит, а точно е дека во рамките на МВР, Одделот за внатрешна контрола врши темелна анализа на фактичката состојба што е поврзана со кривично-правниот настан. Очекувајте во текот на наредните денови да ги споделиме сите поврзани информации со она што ќе биде утврдено од Одделот за внатрешна контрола – рече Тошковски, но вели дека истрагата нема да запре тука и сите инволвирани во трагедијата на директен и индиректен начин ќе одговараат.
