Претседателот на САД, Доналд Трамп, се согласи да го одложи воведувањето на 50 отсто царини за увоз од Европската Унија до 9 јули. Одлуката следи по телефонски разговор со претседателката на Европската комисија, Урсула фон дер Лајен, која побара дополнително време за преговори. Претседателот на САД, Доналд Трамп, соопшти дека се согласил да го одложи стапувањето во сила на 50 отсто царина на увозот од Европската Унија до 9 јули, откако претходно најави дека мерката ќе започне да се применува од 1 јуни. Одлуката доаѓа по, како што рече, „многу пријателски“ телефонски разговор со претседателката на Европската комисија, Урсула фон дер Лајен, пишува Си-Ен-Ен. „Таа сака сериозно да преговара. Деветти јули беше датумот што го побара и се согласив“, изјави Трамп пред новинарите во Њу Џерси, додавајќи дека очекува брзо да започнат разговорите.
Само два дена претходно, Трамп изјави дека „не бара договор“ со ЕУ и најави дека царините од 50 отсто ќе бидат активирани на 1 јуни, по претходно најавената, но исто така одложена, реципрочна царина од 20 отсто во април. Неколку минути по изјавата пред медиумите, Трамп на платформата Truth Social напиша дека „разговорите ќе започнат брзо“. Фон дер Лајен претходно истотo утро на мрежата Х објави дека имала „добар разговор“ со Трамп, нагласувајќи дека „ЕУ и САД споделуваат едно од најважните и најблиски трговски партнерства во светот“ и дека Европа е подготвена „да ги унапреди разговорите брзо и решително“, но дека за постигнување добар договор „е потребно време до 9 јули“. По објавата за одложување на царините, берзите во Азија забележаа умерен раст. Јапонскиот индекс Nikkei 225 се зголеми за 0,8 отсто, додека KOSPI во Јужна Кореја порасна за 0,9 отсто. Индексот Shanghai Composite во Кина се зголеми за 0,3 отсто, додека тајванскиот TAIEX и австралискиот S&P/ASX 200 останаа речиси непроменети. Индексот Hang Seng во Хонг Конг забележа пад од 0,3 отсто.
Трамп особено ги критикува таканаречените „непарични трговски бариери“ и трговските дефицити кои САД ги имаат со други економии. Според податоци на американското Министерство за трговија, САД лани имале трговски дефицит во размена на добра со ЕУ во висина од 236 милијарди долари. Во неделата, Трамп изјави и дека се согласува со ставовите на американскиот секретар за финансии, Скот Бесент, дека нема потреба текстилното производство да се враќа во САД. „Ние не сакаме да правиме патики и маици… сакаме да произведуваме воена опрема, големи работи. Сакаме да правиме ‘AI работи’ со компјутерите“, изјави Трамп. Извор: Новинска агенција МЕТА
