Сојузот на Средношколци информира дека Министерството за образование и наука и Државниот испитен центар го прифатиле нивното барање државната матура да се полага во училишните простории наместо во амфитеатрите на факултетите.
„Согласно оваа одлука, матурантите ќе полагаат во своите училишта, под услов тие да ги исполнуваат потребните стандарди за спроведување на испитите. За училиштата кои не ги исполнуваат овие услови, Државниот испитен центар ќе овозможи алтернативни простории врз основа на доставени барања од страна на засегнатите училишта“, велат од Сојузот. Во врска со оваа одлука, Сојузот на Средношколци ќе даде официјална изјава утре во 12:00 часот пред просториите на Државниот испитен центар. Изјави ќе дадат Берин Мухамед, претседателот на Сојузот на Средношколци на РСМ, и Даниела Јовчевска Михајловска, директорката на ДИЦ.
