Министерот за економија негира дека се чека во Собранието да поминат измените на Законот за работни односи со кои се намалува репрезентативниот синдикален праг од 10 на 5 отсто, за да му се зададе уште еден удар на ССМ. Новата просечна потрошувачка кошничка ќе оди на одобрување во ЕСС. Министерот за економија Бесар Дурмиши чека час поскоро да биде завршено преборјувањето на синдикалните членови и потоа ќе биде свикан Економско-социјалниот совет. Тој негираше дека се чека во Собранието да поминат измените на Законот за работни односи со кои се намалува репрезентативниот синдикален праг од 10 на 5 отсто, за да му се зададе уште еден удар на ССМ. Тој немаше информација дека владината Комисија ја завршила работата, како што веќе објавија медиумите, оти прво требало тие да бидат информирани.
-Комисијата за репрезентативност работи континуирано, ова е сложен процес во кој треба да ги преброи синдикатите и веќе се во завршна фаза. Можеби се преброени членовите на ССМ, но има и други синдикати. Дополнително премногу високиот праг на репрезентативност значеше бариера за другите синдикати, затоа одиме на намалување на процентот на репрезентативност од 10 на 5 отсто, со што ќе се зголеми демократизацијата на синдикалното работење. Намерата е да имаме повеќе синдикати и да ги слушнеме проблемите и на вработените кои членуваат во другите синдикати. Веднаш откако Комисијата ќе заврши со работата, ќе ја свикам седницата на ЕСС оти имаме многу теми за расправа и треба да носиме клучни одлуки, како што е новата просечна потрошувачка кошница, чија изработка е при крај – истакна Дурмиши. Министерот немаше информација дали ССМ писмено се согласил ЕСС да се симне прагот на репрезентативност. Министерот за економија и труд информираше и дека утре на владина седница ќе биде доставена информацијата за вонредните контроли кои Државниот пазарен инспекторат ги правеше по завршувањето на мерките за ограничени цени. Тој најави дека Владата ќе биде информирана и дали трговците доследно ја почитуваат одлуката за јавно огласување на цените на нивните веб- страници.
-Според првичните информации, немало драстично зголемување на цените, освен кај сезонските производи, но тие не спаѓаат во основните прехранбени производи – заклучи Дурмиши. Од Министертвото за економија информираа дека е објавен повикот од Оперативниот план за вработување за 2025 година што се однесува на две мерки, едната за лица над 29 години која предвидува 430.500 денари, грант за основање сопствен бизнис, како и дополнителни до 250.000 денари за лица со попреченост, и втората за лица до 29 години што предвидува до 615.000 денари за почнување бизнис. На повикот може да аплицираат невработени лица евидентирани во Агенцијата за вработување, рурални жени, корисници на гарантирана минимална помош, лица со попреченост, жени жртви на семејно насилство, повратници од странство и граѓани кои сакаат да ја формализираат дејноста.
