БГНЕС пишува дека еврокомесарката целосно и некритички ги повторувала антиевропските наративи на политичката елита во Скопје, што ја ставило во подредена позиција дури и на, како што се посочува, третокласните лидери како Христијан Мицкоски.Бугарскиот медиум БГНЕС со остри критики кон еврокомесарката за проширување Марта Кос поради нејзините изјави за Македонија, како и за извештајот на известувачот за земјава, Томас Вајц. Во текстот под наслов „Билатералниот неуспех“ на Марта Кос – замена на европската позиција во служба на странските интереси, БГНЕС пишува дека еврокомесарката целосно и некритички ги повторувала антиевропските наративи на политичката елита во Скопје, што ја ставило во подредена позиција дури и на, како што се посочува, третокласните лидери како Христијан Мицкоски.
„Скандалозното однесување на комесарката за проширување на ЕУ, Марта Кос во последниве месеци ги оживеа долготрајните сомнежи за нејзините врски со југословенската државна безбедност – УДБА. Прашањата околу нејзината личност повторно доаѓаат до израз откако таа покажува целосна неспособност – или можеби неподготвеност – да го брани заедничкиот европски интерес во Западен Балкан.
Покрај тоа, Кос целосно и некритички ги повторува антиевропските наративи на политичката елита во Скопје, што ја стави во подредена позиција дури и на третокласните лидери како Христијан Мицкоски. Во однос на Македонија, комесарката не само што не го бранеше европскиот консензус од 2022 година, туку и директно ја усвои реториката на скопските политичари во врска со т.н. „билатерализација“ или „билатерален проблем“ со Бугарија – неприфатлива позиција за Европскиот комесар, што е директно кршење на интересите кои тој треба да ги штити“, пишува во текстот.
Дополнителен удар на нејзиниот авторитет, според бугарскиот медиум, бил нанесен со исмевање од страна на српскиот претседател Александар Вучиќ, кој ја нарекол „папагал“. Од неговите зборови станало јасно дека Кос зборувала едно во Брисел, а сосема друго – меко и безкарактерно – во Белград, кога двајцата се сретнале лице в лице.„Поранешната десна рака на диктаторот Милошевиќ задоволно ги трие рацете, гледајќи што се случува јужно од Србија“, наведува БГНЕС.Во текстот се додава дека пред одложеното гласање за извештајот за Македонија, подготвен од известувачот Томас Вајц, во Комитетот за надворешни работи на Европскиот парламент, Марта Кос изјавила дека Комисијата бара начини да ги поедностави процедурите во процесот на пристапување кон блокот, расправајќи со опасноста од „билатерални спорови“ кои влијаат врз процесот.
Таа дури и си дозволи да ги понуди своите услуги во „дијалог“ помеѓу Скопје и Софија, нагласува бугарскиот медиум.
„Не се работи за билатерален спор, туку за заклучоците на Советот на ЕУ од 2022 година и преговарачката рамка”, одговори членот на ЕП Андреј Ковачев (ГЕРБ/ЕНП), истакнувајќи дека властите во Скопје го губат скапоценото време на своите граѓани бидејќи одбиваат да ги исполнат своите обврски. „Знаете многу добро дека ова не е билатерален спор“, рече тој, обраќајќи ѝ се на Кос.
Пратеникот Ивајло Валчев (ЕКР/ИТН) изрази збунетост како премиерот на Македонија, Христијан Мицкоски, дознал и коментирал за амандманот на извештајот за напредокот на Македонија, предложен во писмена форма.
Понатаму во текстот се наведува дека уште во септември минатата година, голем број европски медиуми се сомневале во квалитетите на Кос за да ја задржи функцијата.
Вчера беше одложено гласањето за усвојување на Извештајот за земјава за 24 јуни, на барање на известувачот Томас Вајц, откако ЕПП ја повлече својата поддршка еден ден пред закажаното гласање. Промената на мислењето на ЕПП беше поттикната од бугарските европратеници, кои упатија остри критики кон Томас Вајц и неговите односи со македонските власти.
