Истражувањата покажуваат дека дури осум проценти од Американците земаат лекови за слабеење, па индустријата се прилагодува на ова. Побарувачката за производи без додаден шеќер продолжува да расте, покажуваат најновите податоци на американскиот пазар. Индустријата се повеќе инсистира на вакви производи, бидејќи овој пазар се соочува со огромни проблеми со дебелина, дури и во најмладата возраст. Од друга страна, се зголемува бројот на корисници на лекови за слабеење. Најновото истражување, спроведено минатата година на 1.500 возрасни Американци кои ги земале овие лекови, покажа дека 57 отсто од нив изјавиле дека посветуваат поголемо внимание на додадениот шеќер во производите. Еден од институтите за прехранбена технологија објави дека на глобалниот пазар на лекови за слабеење се предвидува годишна стапка на раст од дваесет проценти до 2030 година, што ќе ги поттикне прехранбените компании да ги приспособат постоечките производи и да создадат нови кои се фокусираат на протеините, здравјето на цревата и хранливите состојки избрани од корисниците на лекови за слабеење.
Друг тренд што се предвидува е намалувањето на шеќерот и солта во производите. Според најавите на американското Министерство за земјоделство, тоа првенствено се однесува на додадените шеќери во училишните оброци, кои до 2027 година треба да се намалат за 10 отсто. Американската Администрација за храна и лекови предложи, почнувајќи од оваа година, информациите за додадени шеќери, натриум и заситени масти предвидува истите да бидат истакнати на предната страна на етикетата на производот. Треба да наведе дали производот има низок, среден или висок процент на додадени шеќери, натриум и заситени масти. Студијата наведува дека повеќе од осум проценти од Американците веќе земаат лекови за слабеење и дека производите наменети за нив треба да бидат богати со хранливи материи, влакна за здравјето на цревата и без додаден шеќер.
Јасно е дека овој проблем во Америка доби поинакви размери и дека дебелината речиси се зема здраво за готово, но и нашата земја не може да се пофали со добри резултати. Оваа болест се јавува како резултат на нездрав начин на живот, а тука не се вклучени само воздухот и водата, туку и храната. Епидемијата на дебелина, како во светот, така и кај нас, е под влијание на храната што ја консумираме, начинот на кој се произведува и начинот на кој ни се продава.
Се проценува дека за 10 години во светот ќе има речиси две милијарди дебели луѓе, а дебелината кај децата ќе се зголеми за дури 100 проценти. Во последните децении, навиките во исхраната на луѓето значително се променија. На глобално ниво, количината на достапна храна се зголемува со текот на времето. На почетокот на 20 век луѓето консумирале помалку од пет килограми шеќер годишно, а денес е многу повеќе, додека потрошувачката на овошје и зеленчук е намалена. Неодамнешното истражување на Светската здравствена организација во европскиот регион покажа дека само 30 отсто од момчињата и 37 отсто од девојчињата на возраст од 13 до 15 години јадат овошје секој ден. Луѓето генерално јадат повеќе затоа што имаат повеќе храна на располагање.
Во Западна Европа, на пример, најмалку две третини од возрасните не се доволно физички активни и тој број продолжува да расте. Светската здравствена организација препорачува возрасните да се занимаваат со најмалку 30 минути физичка активност дневно, како што се пешачење, возење велосипед, домашни работи, градинарство, танцување и качување по скали. Се верува дека редовната и умерена физичка активност може да го продолжи животот на човекот за три до пет години.
