Турскиот претседател Реџеп Таип Ердоган ја нападна опозицијата заради неколкудневните протести, обвинувајќи ја за поттикнување насилство и дестабилизација на земјата. Ердоган ги опиша демонстрациите како оркестрирано шоу, ветувајќи дека одговорните на крајот ќе се соочат со правдата и ќе се каат за своите постапки. „Настапот на опозицијата ќе заврши и тие ќе се срамат од штетата што ѝ ја нанесоа на нашата земја“, рече Ердоган во телевизиско обраќање. Протестите на опозицијата ескалираа по апсењето на градоначалникот на Истанбул кои предизвикаа немири во поголемите градови, со повредени и материјална штета.
Ердоган, исто така, ја доведе во прашање способноста на опозицијата да владее, тврдејќи дека нивните постапки докажуваат дека не може да му се верува на раководството, било на општинско или на национално ниво. „Очигледно е дека на главната опозиција не може да ѝ се довери одговорноста за управување со државата, а камоли за управување со општините“, рече тој. Масовните протести во Турција избувнаа откако градоначалникот на Истанбул, Екрем Имамоглу, беше уапсен пред да биде избран за кандидат на опозицијата на претседателските избори. На Имамоглу во меѓувреме му е одреден притвор за наводна корупција и привремено е суспендиран од функцијата градоначалник на Истанбул.
