„И сега се подготвуваме за дополнителни контрамерки за заштита на нашите интереси и нашите бизниси доколку преговорите не успеат“, рече фон дер Лајен. Претседателката на Европската комисија, Урсула фон дер Лајен ги опиша универзалните царини на американскиот претседател Доналд Трамп како голем удар врз светската економија и рече дека Европската Унија е подготвена да одговори со контрамерки доколку разговорите со Вашингтон не успеат, јавува Ројтерс. Фон дер Лајен рече дека ЕУ веќе го финализира првиот пакет тарифи за до 26 милијарди евра американски стоки за средината на април како одговор на американските царини за челик и алуминиум кои стапија на сила на 12 март. „И сега се подготвуваме за дополнителни контрамерки за заштита на нашите интереси и нашите бизниси доколку преговорите не успеат“, рече фон дер Лајен во изјавата што ја прочита во узбекистанскиот град Самарканд, пред самитот за партнерство ЕУ-Централна Азија. Трамп вчера објави минимална царина од 10 отсто за повеќето стоки увезени во САД, со повисока стапка од 20 отсто за ЕУ.
Фон дер Лајен не даде детали за идните мерки на Европската Унија. Портпаролката на француската влада рече дека дополнителните мерки за поширок опсег на стоки и услуги ќе стапат на сила на крајот од април. Додаде дека сè уште ништо не е решено, но услугите, а особено дигиталните, најверојатно ќе бидат во фокусот. Италијанската премиерка Џорџија Мелони изјави дека ЕУ ќе се залага за договор со САД за да се избегне трговска војна, но рече дека не исклучува адекватен европски одговор. Природата на тој одговор најверојатно ќе биде тема за министрите за трговија на ЕУ кои во понеделник ќе се сретнат во Луксембург. Вашингтон вели дека ефективната тарифа на ЕУ е 39% за американска стока, при што Трамп ги критикуваше правилата за данокот на додадена вредност и јавното здравје на ЕУ кои ја исклучуваат американската живина од нејзиниот пазар. ЕУ, пак, вели дека ДДВ не е тарифа и е сличен на данокот на промет во САД. Извор: Новинска агенција МЕТА
