Од ЈСП „Скопје“ веќе вообичаено не даваат никакво објаснување зошто нема доволно автобуси на линиите 19 и 20 и зошто не се почитува возниот ред. Незадоволство кај граѓаните предизвикува и новата веб-страница на претпријатието, на која возниот ред не е прегледен како порано . Наутро нема редовни автобуси на линиите 19 и 20, воопшто не се почитува возниот ред, па жителите на Шуто Оризари се жалат дека долго залудно стојат на станица чекајќи автобус за да стигнат на работа. Тие велат дека во текот на денот има само по два-три автобуси на ЈСП, дека приватните возат кога сакаат, а попладне одмораат додека автобусите ги остават паркирани во близина на гробиштата „Бутел“. За своето тврдење тие испратија и видео на кое се гледаат неколку паркирани приватни автобуси со број 19 на приватен заграден простор.
Од ЈСП „Скопје“ веќе вообичаено не даваат никакво објаснување на нашите прашања зошто нема доволно автобуси на линиите 19 и 20 и зошто на ваков начин ги дискриминираат жителите на Шутка со оглед на фактот дека јавниот превоз кон другите населби е делумно подобар отколку во изминатите година-две.
Не одговараат ни зошто не се почитува утврдениот возен ред на овие линии, на кои возат и градски и приватни автобуси, иако заедничкиот возен ред е утврден, уште пред повеќе години со одлуката за линиски превоз донесена од Советот на Град Скопје. Но и тој возен ред, не само на овие линии туку и на сите други не се почитува, затоа што нема толкав број автобуси како во 2015 година кога е донесен од советниците, а мнозинството членови на актуелниот состав на Советот не дозволија негова измена и приспособување на моменталната состојба на постојниот возен парк. Можеби од тие причини на новата веб-страница што претпријатието неодамна ја промовираше веќе не може да се најде редовниот возен ред на сите линии, туку мора да се отвора на секоја линија посебно, а притоа се прикажани само наредните неколку поаѓања.
Токму ова предизвика незадоволство и забуна кај граѓаните што редовно користат јавен превоз, кои бараат од ЈСП да го прикаже возниот ред за сите линии и за секој ден за да можат да го планираат патувањето. Многубројни се коментарите на скопјани под објавата на ЈСП за новата интернет-страница во кое го искажуваат својот став за направените промени. Во свое лично и името на многу граѓани што ги користиме вашите услуги и страница, по часови разгледување на новата веб-страница, не можејќи да го најдеме никаде возниот ред на поаѓање на одредена линија, ве замолувам да ја ставите таа опција како порано. Значи, пример, за линија 47, возен ред од Транспортен центар и возен ред од Љубанци. Така ќе можеме да планираме. Сега е непрегледно, а и немаме време да висиме на мобилен и да гледаме мапи. Поим немам зошто не сте го ставиле главното. Никој не може да го најде, па новава страницата ви е практично нефункционална. Треба ли да трчаме по шоферите да ги прашуваме? Средете го најважното! Вака е хаос – се вели во еден од коментарите.
Скопјани тврдат дека наместо да им се олесни на оние што редовно користат автобуси и за таа услуга уредно плаќаат, со новиот начин на информирање, возниот ред е комплетно непрегледен. ЈСП, секоја чест за трудот, ама возниот ред не е прегледен како претходниот, за нас патниците тоа е најважно. Вратете ја само старата шема каде што веднаш се гледаат линиите, веднаш се избира датум и веднаш е видливо кога тргнува првиот автобус, па потоа и поаѓањата за цел ден и тоа за двете насоки. Не е во прашање време на навика и учење нова апликација, туку само прегледност и навремена информираност – коментира друг граѓанин на објавата на јавното сообраќајно претпријатие. Од ЈСП нема одговор на реакциите на граѓаните, иако новата веб-страница ја промовираа без никакво објаснување каде и дали можат да се најдат целосните информации што се неопходни за патниците. Нема ниту објаснување зошто се направени овие промени во известувањето за возниот ред на сите линии.
