ЈП „Лајка“ плаќа значителни суми за отштети од каснувања, а притоа кај нив постои сомнеж за организиран криминал за што веќе, како што тврдат, имаат и индиции, но имаат забелешки и за целокупната постапка, која се води како надоместок на нематеријална штета по напад или од каснување од бездомно куче. Дури 461 тужба за каснување од куче добила ЈП „Лајка“ минатата година. Тоа значи дека немало ден граѓанин да не биде нападнат од бездомно животно, а понекогаш и два-тројца во денот. Според извештајот на „Лајка“ за 2024 година, најмногу каснувања имало на територијата на општина Аеродром, дури 96, потоа во Кисела Вода 86, во општина Центар настрадале 79 граѓани, 65 во општина Гази Баба, во општина Ѓорче Петров 41, во Карпош 40, 34 граѓани биле каснати во Бутел, 11 во општина Чаир, по 3 тужби стигнале од општините Шуто Оризари и Сарај, една од Студеничани, како и 2 тужби во кои не било наведено местото на причинетата штета. Јавното претпријатие задолжено за хуман третман на уличните кучиња, кои се неколку илјади по скопските улици, плаќа значителни суми за отштети од каснувања, а притоа кај нив постои сомнеж за организиран криминал за што веќе, како што тврдат имаат и индиции, но имаат забелешки и за целокупната постапка, која се води како надоместок на нематеријална штета по напад или од каснување од бездомно куче.
Главните докази што се приложуваат во текот на постапката се потврдата од полициската станица и медицинската документација, а одредени адвокати приложуваат и вештачење.
Во однос на првиот доказ односно потврдата од полициската страница, претставува потврда дека одреден настан е пријавен во полициската станица, но полицијата не излегува на терен да ја утврди фактичката состојба односно не изготвува Записник. Со овој документ се потврдува дека таков настан е пријавен, меѓутоа МВР со тоа не потврдува дека се случил. Дополнително на ова, не се утврдува локацијата на штетниот настан, односно дали навистина во дадениот час и улица се случил напад односно каснување од куче – се вели во извештајот на „Лајка“.
Оттаму додаваат дека ретко во кој предмет постои сведок што дал изјава во полициската станица и дека во примените тужби за 2024 година, такви се само два до три предмети. Во ниту еден предмет нема дополнителен доказ, во кој е евидентиран нападот. Поради тоа, како што тврдат од „Лајка“ постои можност настанот да се случил и на приватна површина, дури и надвор од Скопје. Покрај тоа, не се прави ниту идентификација на кучето што нападнало, па освен што може навистина тоа да било бездомно куче, постои можност да станува збор и за куче што има сопственик.
Постапката, технички, е завршена по пријавата во полициска станица, затоа што со утврдената судска практика на ниво на цела Република Македонија, за судот се доволни овие докази и секогаш суди во полза на тужителот – велат од „Лајка“.
Како што се објаснува, во дел од предметите при описот на раната стои гребаница, односно повреда што не ја пробила површината на кожата. Докторот, независно од околностите, не навлегува во вистинитоста на изјавите на пациентот, по службена должност мора на пациентот да му ја даде потребна терапија односно вакцината против тетанус. Притоа, како што е објаснето во извештајот, при самата анамнеза, невозможно е секогаш да се утврди дали повредата настанала како резултат на загриз од куче, а уште помалку од бездомно.
Основни сомневања имаме и во делот на барањата поднесени до Комисијата по напади и каснувања на Град Скопје и во тужбите доставени до ЈП „Лајка“, каде што пристигнуваат барања односно тужби од припадници од исто семејство дека биле каснати во ист ден од куче и од граѓани што тужат 3 пати. Со цел да се сузбијат сите сомнежи и проблематики, предлагаме низа промени, за кои е потребен широк политички консензус – посочуваат од „Лајка“ во извештајот.
Оттаму предлагаат со секоја пријава по напад и каснување од бездомно куче, со крим-техника да се изврши фотографирање и да се даде опис на раните, а полицијата да бара податок за приближно точното време на каснувањето и наведување на точната локација, сѐ со цел да се изврши проверка со помош на видео снимки од околните објекти или од лицата кои посведочиле на нападот. Во однос на медицинската документација, анамнеза да биде формулирана како мислење на пациентот, а не како став на самиот доктор.
Обвинителство, според „Лајка“, треба активно да се вклучи во целокупната постапка и да ги истражи основните сомневања дека постои организиран криминал во однос на оштетните побарувања, како и да ги истражи наодите дека вештачењата се прават исклучиво врз основа на поднесена медицинска документација, а не врз база на клинички преглед. Обвинителство, како што велат оттаму, треба да го истражува и секој затекнат обид за дислокација на кучиња затоа што тие претставуваат опасност за безбедноста и за здравјето на граѓаните, но и за безбедноста на сообраќајот. Со оглед на тоа дека полицијата, и да затекне, нема надлежност да постапува при дислокација на кучиња.
При спроведувањето на сите овие мерки, доказната постапка ќе добие поинаква димензија, судот по автоматизам нема да ги прифаќа тужбите, ќе се воспостави механизам за директна одговорност на неодговорните сопственици, кои ќе одговараат за штетата причинета од нивниот миленик, ќе опадне бројката на тужби, а со тоа ќе се олесни финансиската состојба на ЈП „Лајка“, со што ќе се подобрат и нашите перформанси – се посочува во извештајот.
