Претседателот на Украина, Володимир Зеленски, денеска неколкупати им се заблагодари на Чесите и нивната влада за помошта што и ја пружија на неговата земја од почетокот на рускиот напад и за поддршката на напорите Украина да се приклучи на Европската Унија, за што, како што рече, ќе одлучува Европа, а не поединец подготвен да манипулира. „Чешка го поддржува влезот на Украина во ЕУ. Подготвени сме да ја отвориме првата рунда преговори. Но, тоа треба да биде одлука на цела Европа, а не поединец кој е подготвен да манипулира со Европа“, рече Зеленски на прес-конференција по средбата со чешкиот премиер Петр Фијал.
Украинскиот претседател нагласи дека војната што се води во неговата земја не е војна за судбината на само еден народ, туку за слободата на многу народи. „Можат да менуваат знамиња на московските тенкови, да нацртаат нешто друго, но сепак се обидуваат да ги контролираат другите нации. Русија ги отфрла сите предлози за реално и одржливо примирје. Затоа разговаравме за дополнителен притисок врз Русија. Санкциите треба да останат и да се заоструваат сè додека Русија ја зајакнува својата агресија“, рече Зеленски. Чешкиот премиер Петр Фијала му даде гаранција на Зеленски дека Чешката Република ќе продолжи да ја поддржува Украина и воено да и помага, како со продолжување на чешката иницијатива за муниција за Украина, така и со обуката на украинските пилоти во базите во Чешката Република. „На иницијативата за муниција за Украина успеваме да обезбедиме испораки. Од почетокот на годината до денес испративме половина милион парчиња артилериска муниција во Украина, се надевам дека ќе ја исполниме целта за оваа година. Од нашето искуство знаеме дека отстапките за агресор никогаш не се добар начин. Го уверив Зеленски дека ќе продолжиме да стоиме покрај Украина. Добро сме свесни дека Украина не само што ја брани својата територија, територијален интегритет и независност, туку ја брани и безбедноста на цела Европа“, рече Фијала.
Чешкиот премиер предупреди колку е важно мирот што ќе стави крај на војната во Украина да не биде награда за агресорот. „Ние поддржуваме такво решение што нема да биде оспорено и што нема да значи успех на агресивната политика на Русија. Ние сме активни во „коалицијата на волните“ и подготвени сме да помогнеме и сега и во време на мир, бидејќи веруваме дека најдобра гаранција и за Украина и за Европа е силна, добро вооружена армија создадена со наша помош“, рече Фијала. На новинарско прашање дали стравува дека поддршката на Чешка за Украина може да почне да опаѓа по есенските парламентарни избори доколку на власт дојдат популистите од партијата АНО на поранешниот чешки премиер Андреј Бабиш, Зеленски рече дека Украина апсолутно го почитува правото на Чесите да ја изберат својата сегашност и иднина и дека тоа е целосно внатрешно прашање на Чешка. Зеленски од вчера е во дводневна посета на Прага, при што се среќава со целиот чешки државен врв, а разговарал и со претставници на чешката воена индустрија.
