Заменик-министерката за европски прашања, Викторија Трајков денеска оствари работна средба со градоначалникот на општина Велес, Марко Колев. На средбата се разговараше за потребите и капацитетите на општината за искористување насредствата од европските фондови во реализација на проекти од интерес за граѓаните. При тоа, заменик-министерката за европски прашања Трајков беше информирана од градоначалникот Колев за степенот на искористеност на овие фондови. Со цел рационално менаџирање на европските фондови, заменик-министерката за европски прашања Трајков ја потенцираше подготвеноста на министерството да помогне во делот на дообучување на кадарот како и помош при аплицирањето на истите а се со цел поголема искористеност на средствата од ИПА и ИПАРД програмите.
Градоначалникот на Велес, Колев, на средбата ги презентираше проектите поддржани од ЕУ, со посебен акцент на реализираната изградба и уредување на кејот на десната страна од реката Вардар во Велес, како дел од проектот “Креативни можности во туризмот” со поддршка на ЕУ, во рамките на прекугранична соработка на нашата држава со Грција чија цел е развој на локалната економија. Истакнувајќи дека по 20 години велешани добија модерно уреден кеј, градоначалникот на Велес, Колев ја посочи важноста на поддршката на ЕУ во реализацијата на проектите со кои се подобрува животот на граѓаните, во што, како што кажа, се надева на поддршката и на Министерството за европски прашања во реализацијата на инфраструктурните проекти за велешани. На средбата беа прецизирани и конкретни чекори во насока на подобрување на капацитетите на општината за поголемо искористување на средствата од европските фондови кои се на располагање.
