Екологистите инсистираат на поништување на одобрението за градба на хотелскиот комплекс издадено 2012 година бидејќи е добиено и без Студија за оценка на влијанијата врз животната средина, како и без Елаборат. Да се стопира изградбата на хотелски комплекс во Горица, да се врати шумата и природата во изворна состојба и да се спроведат сите закони и барања за заштита на природното и културното наследство на регионот, побараа граѓанските еколошки организации „Фронт 21/42“ и „Охрид СОС“ во отворено писмо упатено до Владата, Министерството за животна средина, Општината Охрид и други надлежни институции. Екологистите инсистираат на поништување на одобрението за градба на хотелскиот комплекс издадено 2012 година бидејќи го оценуваат како незаконско со оглед на тоа што е добиено и без Студија за оценка на влијанијата врз животната средина, како и без Елаборат, кој е потребен за многу помали зафати од овој. Тие бараат и институциите да ги извршат своите надлежности и да го поништат и урбанистичкиот план кој го предвидел овој објект и изработка на нов кој ќе биде во согласност со Планот и Законот за управување со светското наследство и нема да предвидува изградба на хотелски комплекс.
„Бараме спроведување на сеопфатна оценка на кумулативното влијание на сите инфраструктурни и развојни планови и останати проекти врз исклучителните универзални вредности на наследството. Имајќи ги предвид сите законски прекршувања и можни кривични дела сторени од страна на институциите и инвеститорот Дивелоп Груп бараме Државната комисија за спречување на корупцијата и Јавното обвинителство да ги испитаат сите наводи и да покренат соодветни постапки против сите вклучени лица“, се вели во писмото на двете организации. „Фронт 21/42“ и „Охрид СОС“ укажуваат дека изградбата без Студија за оценка на влијанијата и без Елаборат е спротивно на Законот за животна средина. Од тие причини Општината одамна требало да го поништи одобрението за градба, но не го сторила тоа. Во 2024 година вонреден надзор извршил и Државниот инспекторат за животна средина, кој, според екологистите, не утврдил проблеми во процесот, иако Министерството за животна средина потврдило дека инвеститорот нема ниту елаборат.
На проблематичната градба се осврнале и од УНЕСКО и Бернската Конвенција. Во јули минатата година Комитетот за светско наследство усвоил одлука со која од земјава побарал да го стопира градењето во близина на Студенчишко Блато и Горица Север и на комплексот Горица 3 се додека не се комплетира Студијата, додека, пак, во декември Бернската конвенција ја усвоила последната одлука во која изразила загриженост за развојот на урбан комплекс во рамки на Рамсар подрачјето Студенчишко Блато и почетокот на изградба на нов хотелски комплекс која се базира на стар урбанистички план и се спроведува без законски обврзната оценка на влијанијата. Екологистите директно му се обратија и на премиерот Христијан Мицкоски и го повикаа да ги реализира заложбите за борба против корумпираниот систем за кој во последниот период даваше бројни изјави во јавноста и да не дозволи тие да останат празни зборови додека на терен продолжува да се уништува највредното природно и културно богатство. Извор: Новинска агенција МЕТА
