Во сторијата на насловната страница на Тајмс, коментарите на Блер беа опишани како „најновиот знак дека мејнстрим консензусот за зелените политики се урива“ Британските, но и дел од македонските медиуми во сензационалистички манир ги претставија ставовите на некогашниот премиер на Обединетото кралство, Тони Блер, како дефинитивен пораз на поборниците за климатски промени. Но, голем дел од медиумите ги извадија од контекст, или сосем ги извртеа коментарите на Блер, пишува „Вистиномер“ Бившиот премиер на Обединетото Кралство, Тони Блер, во извештај објавен преку својот тинк-тенк „Тони Блер институт за глобални промени“, имаше неколку критики кон моменталните стратегии за справување со климатските промени. Овие коментари на бившиот премиер ги разгорија страстите на (конзервативните) медиуми во Обединетото Кралство, кои го извадија делумно или целосно од контекст она што го пишува во самиот извештај. Воедно, коментарите на Блер се искористија како повод за славење на „уште еден пораз“ на поборниците за климатските промени.
Во известувањето на насловната страница, Дејли телеграф ги опиша коментарите на Блер како директен „напад“ врз премиерот Кир Стармер, и покрај тоа што напоменаа во самиот напис дека Блер воопшто не ја споменал Велика Британија. Во сторијата на насловната страница на Тајмс, коментарите на Блер беа опишани како „најновиот знак дека мејнстрим консензусот за зелените политики се урива“. „Блер вели моменталните нето нула политики се „осудени на пропаст“, пишува насловот на Би Би Си. „Нето нула е осудено на пропаст предупредува Тони Блер“ пишува насловот на Тајмс. „Нето нула е пропаст, Блер му кажа на Стармер“ пишува насловот на Дејли Телеграф. „Тони Блер направи дупка во плановите на Ед Милибед за нето нула“ пишува насловот на Пејпер. Но, во предговорот на самиот извештајот, Блер оваа идеја ја срочи поинаку: Ова се незгодните факти, што значи дека секоја стратегија заснована на „постепено укинување“ на фосилните горива на краток рок или ограничување на потрошувачката, е стратегија осудена на пропаст, пишува во извештајот.
Инаку, кога се споменува „нето нула“ се мисли намалување на емисиите на јаглерод и останатите гасови на што е можно помала количина којшто ќе може да се апсорбира или трајно да се складира од природата и други мерки за отстранување стакленичките гасови. Со други зборови, по емисиите и нивната апсорпција да остане „нето нула“ нови гасови во атмосферата. Што се однесува до нашите медиуми, изјавата на Блер не беше пренесена многу поразлично. И кај нас имаше пренесување на веста со сензационалистички наслов, извадени од контекст работи и некои сосема погрешни информации што никаде не се споменуваат во самиот извештај на Блер. Освен Офф нет, друг медиум што ја пренесе веста беше Енергетика24. Но, за разлика од Офф нет, тие немаат грешки во пренесувањето на веста. Имено, уште од насловот и поднасловот на написот на Офф нет го пишуваат следното: Тони Блер бара уште порадикални промени – да се укинат и глобалните конференции за климата, зашто не даваат резултати. Читајќи го насловот може да се добие слика како тој ова директно да го има кажано. Но, како и со британските медиуми, Блер воопшто не повикува на целосно укинување на нето нула политиките. Понаттаму, во самиот напис на Офф нет се вели:
Документот потпишан од институтот на Блер оди многу подалеку од преиспитување на целите за гасовите. Се бара целосно укинување на глобалните конференции за климатски промени, познати како КОП, зашто не решаваат ништо. За сериозно соочување со климатските кризи потребно е да се формира „нова коалиција“ што може да испорача резултати. Она што всушност поранешниот премиер го напиша за конференциите е следното: Процесот на COP [Conference of Parties] нема да донесе промени со потребната брзина. Големото собирање на сите нации има свое место, иако веројатно не секоја година. Но, реалноста е дека одлуките на големите земји и политичката насока што ја даваат кон технологијата и финансиските текови, всушност можат да го решат климатскиот проблем. Сепак, не постои соодветен процес што овозможува да се изврши детална и сложена политичка работа, наложена од малкуте нации што можат да направат вистинска разлика во однос на климатските промени. Ако COP ги зголеми глобалните амбиции за климатска акција, сега ни е потребен нов процес што ги зголемува глобалните решенија. Нов кооперативен пристап кон технолошките решенија што би можел да биде следно возбудливо поглавје.
Критиката дека мултилатералната конференција како СОР е преспора за придвижување кон реални промени за справување со климатските промени и можеби е потребен нов начин на заедничко дејствување што ќе биде побрзо и ефикасно е валидна критика. Но, никаде во овој и другите цитати не се споменува укинување на ваквите конференции за климата. А, особено цинично е да се каже дека ваквите конференции не се ефективни кога токму ваква конференција буквално го спречи проширувањето на озонската дупка. Со т.н. „Монтреал протокол“ се лимитираа емисиите на штетни честички како хлорофлуоројаглеродот. Успешноста на овие лимитирања, според извештајот на Светската метеоролошка организација од 2022 г., доведоа до тоа озонската дупка целосно да се затвори во рок од неколку децении. Дополнително, исто така отсуствува контекстот за новите технологии како зафаќање (или ловење) на јаглеродот од атмосферата. Настрана од фактот што повеќе институти, фондации, групи и научни магазини зборуваат дека оваа технологија не е ефективно решение за справувањето со климатските промени, тоа го потврдува и самиот Блер во својот предговор, пишувајќи: Во моментов, зафаќањето на јаглерод не е комерцијално одржливо и покрај тоа што е технолошки изводливо – но политиката, финансиите и иновациите би го промениле ова.
Дополнително, речиси ниту една влада во светот нема донесено закони или стратегии за „нето нула емисии“ со „постепено укинување на фосилните горива на краток рок или ограничување на потрошувачката“. Но, како низа години во минатото и на СОР28 што се одржа на крајот на 2023 г. во Дубаи, светските лидери се согласија да направат постепена „транзиција од фосилни горива“ до 2030 година. Не само тоа, Кир Стармер на самитот за „Иднината на енергетската безбедност“ организирана од Меѓународната агенција за енергетика во Лондон, афирмираше дека неговата влада „се залага за иднина со ниски емисии на јаглерод“ и дека справувањето со климатската криза и зајакнувањето на енергетската безбедност се „во ДНК на неговата влада“ и дека „нема да чекаат, туку ќе забрзаат“. Извор: Новинска агенција МЕТА
