Според претседателот на УСС УКИМ, заложбите на ова тело годинава биле во насока да се прошири опсегот на студенти кои имаат право на субвенции за оброк, додека за следната академска година најавува барање за зголемување на износот на субвенциите што во моментов изнесуваат 140 денари дневно. Измените на Законот за субвенциониран студентски оброк ќе се најдат на дневниот ред на денешната седница во Собранието. Во измените предложени од група пратеници е предвидено менување на условите за тоа кои студенти имаат право на субвенциониран студентски оброк. Освен редовните студенти на додипломски студии, се предлага право на студентски оброк да имаат и студентите запишани на втор циклус студии, како и на интегрирани студии на државните и приватните универзитети во Македонија. Освен тоа, се предлага измена и на членот од Законот каде е наведено дека право на оброк имаат студентите кои не се во редовен работен однос и не се индивидуални земјоделци. Овој член од Законот за субвенциониран студентски оброк сега се предлага да гласи: „Корисници на субвенциониран студентски оброк се редовни студенти запишани на прв циклус, односно втор циклус на студии, како и на интегрирани студии на државните и приватните универзитети во Републиката, државјани на Република Северна Македонија и кои немаат месечен приход по кој било основ поголем од минималната нето-плата во Републиката за тековната година“.
Од Универзитетското студентско собрание на Универзитетот „Св. Кирил и Методиј“ во Скопје (УСС УКИМ) денес апелираа до сите пратеници да ги изгласаат законските измени. „На иницијатива на Универзитетското студентско собрание преку Националното студентско тело се изгласа и донесе одлука за измена на Законот за субвенциониран студентски оброк со кој се проширува опсегот на мерката за нови 4.000 студенти“, изјави на прес-конференција Александар Николовски, претседател на УСС УКИМ. „Со оваа измена се тргнуваат оние услови кои беа за студентите да не се во редовен работен оброк или регистрирани како индивидуални земјоделци, со што овие студенти сега ќе може да аплицираат за мерката. Дополнително, студентите кои се на втор циклус на студии и на интегрирани студии ќе добијат можност да аплицираат за субвенциониран студентски оброк“, додаде Николовски. Според него, заложбите на УСС УКИМ годинава биле во насока да се прошири опсегот на студенти кои имаат право на субвенции за оброк, додека за следната академска година најави барање за зголемување на износот на субвенциите. Студентите кои ги исполнуваат условите добиваат субвенции од 140 денари за еден оброк во денот. Тие средствата ги добиваат на неделно ниво на наменски банкарски картички со кои може да плаќаат кај трговци кои произведуваат или продаваат храна, односно во маркети, пекари, ресторани, сендвичарници и продавници.
Во Законот за субвенциониран студентски оброк е предвидено сумата на субвенциите секоја година да се усогласува со инфлациската стапка, но сумата од 140 денари не е променета веќе две години. Претходно, во јануари, одговарајќи на новинарско прашање на Мета.мк, министерката за образование и наука Весна Јаневска изјави дека за годинава се размислува за зголемување на сумата од 140 на 160 денари дневно. „Во овој момент имаме обезбедено средства за покачување на студентскиот оброк од 140 на 160 денари. Тие се обезбедени во буџетот. Треба уште еднаш да се сретнеме со студентите за да одлучиме дали ќе го зголемиме опсегот. Мислам дека во тој правец се оди – зголемување на опсегот, но во рамките на предвидените средства“, рече Јаневска во јануари годинава. Извор: Новинска агенција МЕТА
