Според истражувањето на американскиот новинар Боб Вудворд, поранешниот американски претседател Доналд Трамп разговарал и по седум пати со рускиот претседател Владимир Путин, откако се исели од Белата куќа на почетокот на 2021 година. Дополнително, како што тврди Вудворд, Трамп како американски претседател лично му испратил на Путин тестови за ковид на почетокот на ковид-пандемијата, во време кога немало доволно од тие тестови во САД. Истовремено, како што се тврди, Путин го советувал Трамп да не зборува за тоа, бидејќи „таа постапка би можела политички да му наштети“.
Книга за Украина и војната на Блискиот исток
Вудворд стана светски познат во раните седумдесетти години на минатиот век, со откривањето на скандалот Вотергејт во весникот „Вашингтон пост“. Оттогаш, тој има репутација на еден од најреномираните истражувачки новинари во САД. Неговите откритија за односот меѓу Путин и Трамп во вторникот беа објавени и во весникот во Вашингтон. Тоа е всушност извадок од неговата нова книга „Војна“ , која треба да се најде во продажба следната недела.
Книгата не е само за врските на Трамп со Русија. Таа се занимава и со влијанието на американските претседатели врз геополитиката, особено со војните во Украина и на Блискиот Исток. Според „Вашингтон пост“, Вудворд обезбедува и бројни интерни информации – вклучително и на актуелниот шеф на Белата куќа, Џозеф Бајден . Така, американската ТВ станица Си-Ен-Ен пренесува дека актуелниот американски претседател, како што тврди Вудворд, го нарекол израелскиот премиер Бенјамин Нетанјаху „кучкин син“.
Трамп негира,Кремњ само делумно
Но, ништо од тоа во моментов, среде изборната кампања, не генерира толку многу кликови на интернет како наводните откритија за Доналд Трамп. Очигледно и затоа што Вашингтон пост со својата рецензија на книгата однапред даде штихворт за тоа. Портпаролот на предизборниот тим на Трамп, Стивен Чунг, тврдењата на американскиот новинар ги нарече „измислени“ и додаде дека вистинскиот жанр во кој е објавена книгата е фикција.
Портпаролот на Кремљ Дмитриј Песков во изјава за различни медиуми негираше дека наводните телефонски разговори меѓу Трамп и Путин навистина се случиле. Сепак, тој ги потврди наводите на „Вашингтон пост“ за испорака на опрема за корона вирусот, но потсети и дека Русија во 2020 година испратила и медицинска опрема и заштитна облека во САД.
„Муниција” за кампањата на Камала Харис
Демократската партија брзо реагираше и не ја пропушти шансата да ги искористи откритијата на Вудворд за изборна кампања против Трамп, кој се кандидира за Белата куќа како кандидат на Републиканската партија. Само неколку часа по објавувањето на написот во „Вашингтон пост“, Камала Харис објави видео на платформата Икс во кое се монтирани делови од различни клипови во кои Трамп пофално зборува за неговиот однос со Путин.
Кандидатката за претседател на Демократската партија го коментира видеото со зборовите: „Додека Американците беа болни и ги немаа достапни тестовите за Ковид кои спасуваа животи, што правеше Доналд Трамп? Тој тајно му испраќаше тестови за Ковид на Владимир Путин“. Засега не е јасно каков ефект ќе имаат овие откритија врз предизборната кампања во САД, изјави ТВ водителот Лоренс О’Донел за MSNBC: „Во пред-Трамп ерата, еден таков извештај ќе беше доволен за да се стави крај. претседателска кандидатура (…) и денес би било доволно да се уништи демократска кандидатура“, рече тој.
Но, „на Трамп очигледно не може да му се одземат 47 проценти од гласовите“, додаде О’Донел и оцени дека поради специфичноста на американскиот изборен систем, во одредена констелација може дури и да му помогне да победи на изборите.
Блискоста на Трамп со Путин
Самиот факт дека Доналд Трамп има особено добри односи со Путин е нешто што самиот Трамп јавно го тврдеше. На крајот на септември оваа година, за време на средбата со украинскиот претседател Володимир Зеленски во Њујорк, тој истакна дека овој однос со Путин може да помогне брзо да се стави крај на војната во Украина, под услов тој (Трамп) да биде избран за нов американски претседател во ноември. Противниците на Трамп редовно го обвинуваат кандидатот на Републиканската партија дека е премногу близок со шефот на Кремљ, а понекогаш дури и тврдат дека Трамп работи во корист на Москва. Договорот за ставање крај на војната во Украина, како што некои стравуваат, на крајот може да значи големи отстапки на Трамп за Москва.
Многумина се загрижени и за погледот на Трамп кон НАТО: Северноатлантската воена алијанса, која вклучува 30 европски земји покрај САД и Канада, но не и Русија и нејзините сојузници, Трамп еднаш го нарече „застарен“ модел. Во февруари тој дури тврдеше дека ќе го охрабри Путин да ги нападне оние земји кои не вложуваат толку пари за нивната одбрана, колку што всушност би морале како членки на НАТО.
Трамп – човек на Путин?
Ставот на Трамп кон Русија е збунувачки за некои аналитичари, бидејќи наводната руска кампања за лажни вести му помогна на Трамп да победи на изборите во 2016 година. На пример, Роберт Милер дошол до тој заклучок. Тој како специјален советник имал задача да ги истражи наводите, но во својот познат „Извештај на Мулер“ не презентирал докази за некаква криминална активност или некаков вид заговор. Сепак, тој заклучи дека тимот на Трамп се обидел да ги скрие контактите со руските агенти, односно дека Трамп лично се обидел да ја спречи истрагата.
Поранешниот советник на Трамп за национална безбедност Х.Р.Мекмастер пишува за времето поминато во Белата куќа дека било речиси невозможно да се дискутира критички со Трамп за неговата политика кон Русија. Според тврдењата на Мекмастер, Путин многу вешто манипулира со Трамп: „Путин, бескрупулозниот поранешен агент на КГБ, со ласкање го заинтригира егото на Трамп и неговата несигурност“.
Во исто време, како што додава Мекмастер, Трамп не е првиот американски претседател кој го потцени Владимир Путин. И Џорџ Буш помладиот и Барак Обама, како што вели тој, се противеа на поцврстите односи на САД со Кремљ.
