Иран го предупреди американскиот претседател Доналд Трамп дека ќе започне акции внатре во САД со терористички „заспани ќелии“ доколку биде нападнат, во порака испратена еден ден пред американските напади, објави NBC News повикувајќи се на разузнавачки извори. Информациите стигнаа до Трамп преку посредник на самитот на Г7 во Канада минатата недела, кој американскиот претседател го напушти претходно, изјавија двајца американски претставници и лице запознаено со заканата.
Американската администрација, како и безбедносните служби во најголемите градови се во состојба на готовност за каква било потенцијална одмазда од страна на Техеран во рамките на Соединетите држави, според американската телевизија. Одделот за домашна безбедност во неделата предупреди дека „иранскиот конфликт претставува зголемена закана за Соединетите држави“.
Според овие извори, Иран, исто така, би можел да изврши сајбер напади врз американските мрежи и да бидат насочени кон претставници на американската влада. Во саботата вечерта, САД бомбардираа три ирански нуклеарни постројки, Фордо, Нетанц и објектот во Исфахан, а во нападот учествуваа повеќе од 125 американски воени авиони.
