Влатко Кешишев, еден од обвинетите за киднапирањето и убиството на 14-годишната Вања Ѓорчевска и Панче Жежовски, денеска сведочеше во судница. Тој најпрвин побара од судница да биде изнесен првообвинетиот Љупчо Палевски, бидејќи, од страв, не можел да сведочи во негово присуство. Тој го раскажа денот кога била убиена Вања. На местото на убиството, кај Бразда, тој стоел на одалеченост од 200 метри од девојчето и останатите, бидејќи Палчо му дал задача да чува стража, односно да не наиде некој. – Неколку пати се свртев кон нив, но и внимавав кон патот. Палчо во раката држеше пиштол. Потоа слушнав истрел, но некако тап истрел. На крајот ме викнаа да побрзаме, да се затрупа телото. Не го видов, веќе беше покриено со земја. Ставивме некои работи,ќебе,столици, беше буниште. Тогаш Палчо ги избриша лопатите и копачот со вд 40. Ги стави во ,,кангуто”. Влеговме позади јас и Боре, а Палчо возеше. Во ,,цитроенот” беше Манев. Кога излеговме на асвалтот, на едно 500 метри одалеченост ми рече да ги фрлам лопатите покрај патот, имаше многу капини. Ги фрлив и продолживме до местото каде што го запалија ,,цитроенот”, сведочеше Кешишев. Според неговото сведочење, тој не бил свесен дека Палевски убил дете. Дознал кога се вратиле во партијата. Додека варел кафе, видел на фејсбук дека е исчезнато дете. Го прашал Палевски, ,,што е ова”, но не добил одговор.
Тој истакна дека не може да тврди чиј е пиштолот, но, како што рече, тука на судењето слушнал дека можно е да е на Боре Видевски. Појасни дека по убиството пиштолот и моторолите биле ставени во Ранче, а тоа секогаш со себе го носел Палевски. На претходните рочишта и обвинетиот Велибор Манев сведочеше дека Палевски е извршителот на убиствата, и на девојчето и на Жежовски. Судењето е во тек. Според обвинението, Љупчо Палевски, Боре Видевски, Велибор Манев, Влатко Кешишев и Александар Ѓорчевски, се обвинети дека заедно испланирале грабнување на 14-годишната Вања со цел да присилат член на нејзиното потесно семејство да даде парични средства за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „Цитроен“ за да го користат за грабнување на детето во Скопје. Малолетната Вања и велешанецот Панче, беа пријавени за исчезнати на 27 и 24 ноември, а на 3 декември 2023 година беа пронајдени мртви во близина на Скопје и Велес.
