Според информациите што ги добиле од лекарите од Литванија, како што информира Небојша Настов, директор на болницата „Св. Наум Охридски“, 29-годишниот Александар Карадаковски од Кочани починал како резултат на директното оштетување на голем дел од дишното стебло, речиси 90 проценти, поради вдишениот чад, што резултирало со смрт. Карадаковски имал 36 отсто изгореници по телото, главно кај главата, вратот и горните екстремитети, што предизвикало рани и инфекции, а му откажале и бубрезите на 1 април, односно бил ставен на дијализа.
Ова го посочи министерот за здравство Арбен Таравари на денешната прес-конференција. По пожарот во Кочани, Карадаковски бил донесен во болницата за хируршки болести „Св. Наум Охридски“ во Скопје во 6 часот утрото. „ Изгорениците беа од втор и трет степен. Поради чадот што го вдишал, оштетени му биле дишните органи. Колегите во Литванија, со кои редовно се брифиравме, ни потврдија дека било утврдено оти е оштетен голем дел од дишното стебло кај Карадаковски поради што дошло до влошување на состојбата и подлегнување на повредите“, изјави Настов.
