Амбасадорката на Република Северна Македонија во Обединетото Кралство, Н.Е. Катерина Ставреска, е добитничка на престижното признание „Инспиративен лидер“ и е вклучена меѓу Global Power Leaders 2025, на церемонија што се одржа во Домот на лордовите во Лондон, како дел од годишниот Global Business Conclave 2025. Ова високо меѓународно признание се доделува на истакнати индивидуи со глобално влијание, визија и лидерство во своите области. Ставреска беше истакната како дипломат со „смела визија, посветеност на дипломатијата и исклучително влијание на меѓународната сцена“ – се наведува во официјалното образложение.
Катерина Ставреска е искусна дипломатка со богата кариера во областа на надворешната политика, одбраната и мултилатералната соработка. Од почетокот на 2024 година ја извршува функцијата амбасадорка во Лондон, а пред тоа беше директорка за НАТО и безбедносна политика во Министерството за надворешни работи, каде го основа и водеше Секторот за НАТО (Д-НАТО). Во тој период, таа одигра клучна улога во зајакнување на координацијата помеѓу македонската државна политика и стратешките приоритети на НАТО, особено во делот на интеграцијата, одбранбените реформи и регионалната безбедност.
Меѓу нејзините најзначајни ангажмани е и работата како шефица на Кабинетот и главна советничка за надворешна политика на поранешната заменик-претседателка на Владата и министерка за одбрана, Радмила Шекеринска. Во тој период (2017–2020), Ставреска беше меѓу клучните личности во процесот на пристапување на Северна Македонија во НАТО. Истовремено, нејзиниот ангажман во имплементацијата на вториот Национален акциски план за Резолуцијата 1325 на ОН, во соработка со британските воени претставници и UN Women, резултираше со конкретни промени – меѓу кои и назначувањето на првата жена аѓутант на Претседателот на Армијата.
Од МНР истакнуваат дека Ставреска е дипломат од новата генерација, која ги комбинира техничкото знаење, стратешката визија и вредностите на родова еднаквост и меѓународна солидарност. Со најновото признание, таа не само што ја зајакнува позицијата на Северна Македонија на дипломатската карта, туку и ја афирмира улогата на жените лидери во меѓународната политика.
