Пекинг размислува за укинување или намалување на царините за одредени американски производи, вклучувајќи медицинска опрема и индустриски хемикалии, објави утринава Ројтерс. Според извори блиски до ова прашање, кинеското Министерство за трговија формирало работна група за да состави списоци на производи кои би можеле да бидат ослободени од дополнителни царини. Според информациите објавени во кинеските медиуми, се разгледува можноста за изземање на осум производи поврзани со полупроводници, додека мемориските чипови нема да бидат земени предвид.
Списокот од 131 категорија на производи кои би можеле да бидат ослободени од тарифи, вклучително и вакцини, хемикалии и млазни мотори, исто така беше објавен, иако Ројтерс не можеше да ја потврди листата. Додека Соединетите Држави веќе обезбедуваат олеснувања за одредени производи, како што се електронските компоненти, ослободувањето од царини од страна на Кина може да ги олесни трговските односи и да ја намали економската штета за двете страни, велат експертите. Ваквиот чекор би можел да ги ублажи последиците за американската економија и да го намали притисокот врз администрацијата на Белата куќа, која се соочува со се поголеми предизвици во однос на трговската политика. Кинеските власти не одговорија веднаш на прашањата за иницијативата, а нема официјална потврда дека царинското ослободување ќе се случи.
