Според анализата на НБРСМ, поплаките кон банките и штедилниците во 2023 година се зголемиле за 70 проценти. Најголемиот дел од поплаките се концентрирани кај една банка и за еден вид услуга, а само 3 отсто од граѓаните се жалат на однесувањето на службениците. Ако во 2022 година е забележано зголемување на поплаките во банкарскиот сектор за 25,7 отсто, нивниот раст во 2023 година изнесувал 70,1 отсто. Најновата анализа на Народна банка покажува дека дури 8.744 граѓани во 2023 година се пожалиле до банките и на штедилниците.
– Најголемиот дел, односно 8.236 поплаки или 94,2 отсто ѝ припаѓаат на групата големи банки, 404 поплаки или 4,6 отсто им припаѓаат на средните банки, додека кај групата мали банки има 83 поплаки или 0,9 отсто (преостанатите поплаки се однесуваат на штедилниците). Значајно е да се истакне дека најголемиот дел од поплаките се концентрирани кај една банка и за еден вид услуга – прецизираат од НБРСМ.
Анализата на структурата на поплаките по одделни банкарски производи и услуги покажува дека во 2023 година преовладуваат поплаките за други директни канали (СМС, банкомати и сл.) со учество од 48 отсто, при што најголемиот дел од нив се однесуваат на функционалностa на услугата кај банкоматите на една банка. Следува структурното учество на поплаките за дебитните и кредитните картички (31 отсто); за платежните сметки (5 отсто од вкупните поплаки), каде што поголемиот дел од поплаките се однесуваат на надоместоците, рекламациите (на пр. сторно налози) или други аспекти. Мал дел, односно само 3 отсто од граѓаните се пожалиле и на однесувањето на вработените, потрошувачките кредити, електронското и мобилното банкарство (1 отсто од поплаките) каде што најголемиот дел од поплаките се однесуваат на функционалноста на услугата. Инаку, до НБРСМ пред две години стасале вкупно 204 дописи од физички лица, а 97 отсто од нив се однесувале на работењето на конкретни банки и штедилници.
– Во текот на 2023 година, Народната банка ги спроведе првите теренски контроли на банките посветени на заштитата на потрошувачите, а беа спроведени и повеќе вонтеренски хоризонтални контроли за одделни прашања кај сите банки – посочуваат од НБРСМ.И додека македонските потрошувачи масовно се жалат на финансиските услуги, тие неволно се впуштаат во какви било граѓански постапки (парници), поради стравот дека на другата страна имаат противник што располага со потребни ресурси за да ангажира добри правни застапници – адвокати, при што ризикот да го изгубат спорот е повеќе од веројатен. Анализата на Организацијата на потрошувачите меѓу другото покажува дека понекогаш плаќањето за увид во сметката или за трансакција од сметка на сметка е незначителен износ на пари, па во тие случаи граѓаните сметаат дека граѓанската парница за багателен спор е непотребна. Истото се случува и кога се соочени со хакерство, односно измами во дигиталниот простор, бидејќи според нив, меѓународните спорови се скапи и мала е веројатноста дека оние што ги ограбиле нема да бидат пронајдени.
