Во ова време лани, претседателот на Србија изјави дека 40 часа неделно е кратко работно време. „Не ме интересира што мислеле работниците во Чикаго. Мора да се работи понапорно“, рече Александар Вучиќ во април 2024 година, додавајќи дека седумчасовниот работен ден, кој во тоа време го најави Црна Гора, нема да се случи во Србија. А во Србија, според официјалните податоци на европската статистика, работниците работат убедливо најмногу во однос на сите земји од ЕУ – 41,4 часа неделно, според извештајот на Евростат за последниот квартал од 2024 година.
Ситуацијата е полоша само во Турција, каде што работната недела трае 42,6 часа. Просекот на ниво на Еврозоната е, патем, 35 работни часа неделно, а неколку земји се под ова ниво. Најкратката работна недела е во Холандија и трае 30,6 часа. Меѓународниот ден на трудот се слави на 1 мај и историски е поврзан со работничкото движење од крајот на 19 век и големиот штрајк одржан во Чикаго, каде што се бараше воведување на осумчасовен работен ден. Во многу земји е прифатен како национален празник. „Во деновите на државните и верските празници што се слават во Република Србија, државните и другите органи, трговските друштва и другите форми на организирање за вршење на дејности или услуги не работат, освен на Денот на победата, кој се слави во работен ден“, се вели во Законот за државните и другите празници, пишува Н1 Србија.
