Јавноста не може со сигурност да знае дали на средбата Мицкоски-Филипче што траела нешто повеќе од час и половина било зборувано нешто што не е кажано од актерите, ниту, пак, дознато од медиумите и нивните извори. Но, според сите јавно достапни елементи за оваа средба, речиси сите прашања во соопштението од ДУИ за вчерашната средба се спин, насочен кон влошување на меѓуетничките односи во државата, односно создавање недоверба на овој план. Во соопштение на партијата ДУИ за средбата на Христијан Мицкоски и Венко Филипче во Владата, може да се детекрира спин, пишува Вистиномер: Спин: Како е можно лидерска средба за таканаречен „нов општествен договор“ да се одржи меѓу првопласираната и третопласираната партија на изборите? Дали критериумот за учество во овие преговори е етничката припадност, наместо демократскиот легитимитет? Дали ова значи дека се воведува нова практика на едноетничко моделирање на државата, каде што Албанците и другите заедници се сведени на набљудувачи? Дали „новиот општествен договор“ е продолжение на коалицијата на олигархијата Мицкоски–Заев?Дали оваа иницијатива претставува почеток на пост-Охридско прекројување на уставниот модел на Северна Македонија? Зошто на средбата не беше присутен ниту еден претставник од албанската заедница – ниту од позицијата, ниту од опозицијата – ако навистина се разговара за иднината на државниот поредок? Дали оваа средба е обид за воспоставување на нова политичка хиерархија врз основа на етничка припадност, каде што Албанците се отстранети од суштинските процеси на одлучување?… Извор: Фокус – вест/ДУИ – 04.04.2025]
Контраспин: Опозициската партија ДУИ – која во континуитет претендира дека е единствен заштитник на правата на Албанците во земјава – во партиски комуникациски став со јавноста преку серија прашања за вчерашната средба Мицкоски-Филипче, спинува за идните меѓуетнички односи. Една од поголемите шпекулации во форма на прашање е она дека иницијативата за соработка во однос на носење на клучните законски реформи во евроинтегративните процеси, а што начелно ја договорија Мицкоски и Филипче, „претставува почеток на пост-Охридско прекројување на уставниот модел на Северна Македонија“. Спинот е многу опасен за делот од јавноста што не ги следи политичките процеси во земјата на дневна основа. А факт е, дека иницијативата за средба ја поднесе лиерот на СДСМ Венко Филипче во текот на последната недела од март. Еве што изјави Филипче во првото претставување на идејата на 27 март: Следната недела јас ќе повикам на лидерска средба во Собранието, со лидерите на најголемите политички партии, на кои што сакам да го презентирам мојот план што јас мислам дека ние треба и имаме обврска да направиме за државата. Да се направи тоа што суштински треба, вистински реформи во правосудството, да се направи тоа што суштински треба за да се промени здравствениот систем, да почне изградбата на Клиничкиот центар. Да се направат суштински промени во системот на образование, да се дуплираат примањата на наставниците, да се осигураме дека нашите деца ќе имаат добра едукација. Да се направи дефинитивна промена во системот на јавна администрација, гледаме дека и покрај тоа што начелно има превработеност има сегменти каде што работници фалат, рече Филипче.
Значи, идејата на Филипче не беше средба на двајца лидери на најголемите македонски партии ВМРО -ДПМНЕ и СДСМ, туку средба на лидерите на партиите застапени во Собранието. Тој на втори април ги прецизираше и темите и додаде дека ќе побара средба со Мицкоски за да се организира лидерската средба. По ова, Мицкоски рече дека ќе прими Филипче и на полноќ ако требало за да проценел што предлага опозицискиот СДСМ. До средбата дојде многу брзо по оваа изјава, односно вчера (03.04.2025). Значи првиот спин од страна на ДУИ кој парафразирано гласи дека поради етничко прекројување на државата се сретнале лидерите на двете најголеми македонски партии, е целосно извртување на вистината. Ниту се сретнале однапред планирајќи да се сретнат само тие двајца, ниту најавените теми со нешто укажуваат дека ќе се зборува за меѓуетничките односи. Вториот спин дека на средбата на која се разговорало за „нов општествен договор“, всушност, се разговарало за отстранување на Албанците од процесите во општеството, е најлесно видлив доколку се погледне суштината на изјавите и од Мицкоски и од Филипче по средбата. Едноставно побараа вклучување и еден инклузивен процес. Ценам дека како политичар и како човек, како најголеми (партии-н.з.) треба да привлечеме од сите слоеви од општеството и интелектуалци, и невладини, и политички партии кои што можат да помогнат да помогнат во одредени процеси… Јас ценев дека со една ваква средба ќе испратиме порака, дека ние политичарите ја научивме лекцијата и дека кон граѓаните треба да рефлектираме порака на обединување, на единство, посебно околу клучните прашања, стожерните прашања и низ поинаква оптика да ги гледаме работите кога станува збор за таков тип на прашања… вели Мицкоски.
И од страна на СДСМ се појаснува разговорот, иако инклузивноста на другите партии е неспорна сè уште. Имавме добар и конструктивен состанок со премиерот. Јасно е дека до него стигна пораката, барањето на граѓаните за некаква форма на заедничка работа во сфери коишто се битни за подобрување на квалитетот на нашето живеење… Во следниот период ќе номинирам неколку експерти од областа на правосудството и енергетиката, кои ќе се вклучат во изработката на овие законски решенија“. Претседателот на СДСМ истакна дека во иднина очекува и другите политички партии да се приклучат на овој модел на соработка, потенцирајќи дека „мора да испратиме порака на обединување за доброто на државата“ – го цитираат од СДСМ нивниот лидер. Забележливо е дека сега од речникот на СДСМ (а и од ВМРО-ДПМНЕ), веќе не се разговара за лидерска средба во Собранието, но сепак, инклузивноста во процесот на сите партии и други актери во општеството останува и кај двете најголеми македонски партии по нивната лидерска средба. Конечно, ДУИ во своите спинови околу меѓуетничките односи ја премолчуваат првата понуда од Филипче, го премолчеа одговорот на таквата понуда кој од нивна страна го немаше (се фокусираа на парламентарна комисија за Кочани), го премолчеа и генерално негативниот став за таква средба од коалициските партнери во владата, од ВЛЕН и од ЗНАМ. Јавноста не може да знае дали на средбата што траела нешто повеќе од час и половина било зборувано нешто што не е кажано од актерите, ниту, пак, дознато од медиумите и нивните извори. Но, според сите јавно достапни елементи за оваа средба, речиси сите прашања во соопштението од ДУИ за вчерашната средба се спин, насочен кон влошување на меѓуетничките односи во државата, односно создавање недоверба на овој план. Извор: Новинска агенција МЕТА
