„Бидејќи е таква ситуацијата, може да се очекува блокада на институциите, бидејќи нема да има плати за пожарникарите, градинките, школите, библиотеката, нема трансфер на средства за КЈП Водовод, нема исплата на обврски кон добавувачи, спортски друштва и здруженија на граѓани“, вели советникот Крстевски. Општина Кочани се соочува со сериозна институционална блокада по оставката на градоначалникот Љупчо Папазов, поднесена ден по катастрофалната трагедија што го потресе градот. Без ново градско раководство, исплатите кон јавните служби, институциите и локалните проекти се заглавени, предупредува независниот советник Венко Крстевски. Советникот Крстевски, кој е во својот втор мандат, јавно се огласи преку социјалните мрежи, апелирајќи на итно назначување на вршител на должност градоначалник.
– Бидејќи е таква ситуацијата, може да се очекува блокада на институциите, бидејќи нема да има плати за пожарникарите, градинките, школите, библиотеката, нема трансфер на средства за КЈП Водовод, нема исплата на обврски кон добавувачи, спортски друштва и здруженија на граѓани – вели Крстевски. Тој предупредува дека процедурите за уверенија за социјална помош, оставински постапки, купопродажни договори и одобренија за градба се во целосен застој, додека нелегалните објекти продолжуваат да функционираат непречено Крстевски потсети дека постоеја најави за сериозна финансиска поддршка за Кочани од централната власт, но досега тие средства не се одобрени.
– Имаше најави за финансиска помош, но до денес, со одлука на Владата, тие пари требаше да бидат одобрени. Ветувањата спласнуваат, а прашањето е дали и ова ќе остане уште едно „чудо за три дена“? – реагира Крстевски. Тој повика итно да се обезбедат финансии за изградба на Центар за рехабилитација со геотермални води, Пензионерски дом и прифатилиште за улични кучиња, како и за регионално прскање против комарци. Иако во моментот престојува во Виена, Австрија, Крстевски нагласи дека прашањето за избор на ново градско раководство не може да се игнорира и ги повика Владата и најголемата опозициска партија да најдат решение.
– Не одлучувам за изборот на ВД градоначалник, но сметам дека тоа мора да се направи со широк консензус. Ги повикувам власта и опозицијата да помогнат на Кочани во најбрз рок – истакна тој.
