Мицкоски додаде дека се вршат финални подготовки, има и тело кое го води потпретседателот на владата Љупчо Димовски, каде се соодветните министри и директори на институциите.
– Подготвени сме оваа година да интервенираме поорганизирано. Имаме план, точно ќе знаеме и кој е во шумите, ценам дека оваа година не би сакал да има пожари, но сме многу поподготвени, потенцираше премиерот Мицкоски.
Но, само што го постави за директор на Дирекцијата за заштита и спасување, Мицкоски беше демантиран од Стојанче Ангелов. Сега веќе бившиот директор на ЦУК кој се прослави медиумски со гаснењето на ланските пожари, во првата изјава како директор на ДЗС рече дека оваа институција веќе подолго време се наоѓа во агонија.
Покрај недостиг на пилоти постојат и проблеми со сервисот на „Ер тракторите“ во овој момент се уште нема доволно потпишани договори со тимовите за брз одговор вклучително и со тимовите за гасење на пожар на отворен простор, посочи на денешната прес-конференција Стојанче Ангелов кој е назначен за нов директор на Дирекцијата.
Ангелов истакна дека во институцијата има недостиг на опрема, обука, физичка подготвеност, дека инспекцискиот надзор на противпожарна заштита е во исклучително лоша состојба, дека недостига сериозен број на соодветно образовани и обучени инспектори, но и дека постојат сомнежи околу исправноста на дозволите кои ги издава ДСЗ.
-Во моментот во ДЗС работат само неколку специјалисти за ракување со неексплодирани ниско експлозивни средства, додека оние отстранетите и собрани се чуваат на несоодветен начин. Постојат и други слабости, но за нив дополнително ќе информираме, рече тој.Во однос на подготвеноста на институциите за летото кое претстои тој рече дека сериозно се работи на подготовка за полесно справување со предизвиците кои ќе следат.
-Во нашата држава нема ниту еден функционален Ер трактор, но јас сум оптимист дека набргу ќе ги имаме трите Ер трактори заедно со пилоти, изјави Ангелов.Премиерот Мицкоски посочи дека еден од проблемите за жал е што дуализам во две институции и не само тоа на повеќе нивоа има неусогласеност на командната политика за справување со пожарите, односно имаме Дирекција за заштита и спасување и Центар за управување со кризи и тоа се менува.
– Како влада зададовме задача некаде од октомври почнеме процес на спојување на овие две институции во една и тоа е барање и на НАТО како реформа. Да знаеме која е таа институција која дојавува и се справува и има вертикална одговорност. Исто така општините, пожарникарите, но и доброволните друштва кои често пати се активираат и за тоа добиваат хонорари. Ако целиот овој систем функционира беспрекорно ние ќе немаме потреба од интервенција на МВР или војската. Нормално за време на сезона мора да знаеме кој се движи во шумите, да знаеме кои се луѓето и каде да има одговорност доколку се случи пожар, рече Мицкоски.
Оваа година ќе има забрана за движење во шуми и секој кој ќе сака да се движи, спортува, планинари ќе може да извади соодветна белешка.
– Од друга страна оној кој е одговорен за инфраструктурата, пристапните патишта во шумите, тоа е Национални шуми, тие минатата година беа со демотивирани вработени и неисплатени плати, а дрвосечачи примени кои не се подготвени на работата која треба да ја вршат, немаше нафта, возилата гаражирани, беше тешко сето да се пробива. Чекор по чекор интервениравме, нагласи премиерот Мицкоски.
Додека тие се убедуваат дали подготвени ќе ја дочекаме летната сезона на шумски пожари која е пред прагот, информациите говорат дека ланските пожари кои ги гасневме со странска помош, направиле проценета штета од 83,8 милиони евра. Ова е процената што „Национални шуми“ во објавениот годишен извештај на јавното претпријатие за 2024 ја проектира како загубен национален ресурс.Ова е убедливо најголемата регистрирана штета на годишно ниво во земјата предизвикана од претежно летни пожари. Претходно најголемата загубена сума од 38,77 милиони евра беше утврдена во 2021 година.
