Не е доволна понудата на Брисел нула за нула, вели американскиот претседател, но укажува дека е отворен за договор доколку блокот се обврзе да го затвори трговскиот дефицит на стоки. Европската унија ќе мора да се обврзе да купи американска енергија од 350 милијарди долари за да добие одложување од огромните царини на Доналд Трамп, рече американскиот претседател доцна во понеделникот, отфрлајќи ја понудата на Брисел за царини „нула за нула“ за автомобили и индустриски стоки, пренесува „Политико“. Коментарите на Трамп на прес-конференцијата во Белата куќа беа одговор на претседателката на Европската комисија, Урсула фон дер Лајен, која претходно во понеделникот рече дека ЕУ понудила да ги намали тарифите на блокот на нула за автомобили и индустриски стоки увезени од САД, доколку Трамп возврати. Запрашан од новинарот дали понудата е доволна за тој да се повлече, Трамп рече: „Не, не е“. „Имаме дефицит со Европската унија од 350 милијарди долари и тој брзо ќе исчезне“, рече Трамп. „Еден од начините на кој тоа може лесно и брзо да исчезне е дека ќе мора да ја купат нашата енергија… тие можат да ја купат, ние можеме да отфрлиме 350 милијарди долари за една недела. Тие треба да купат и да се обврзат да купат исто толку енергија“.
Идејата за купување енергија од САД во обид да се спречат царините не е нова. Речиси веднаш штом Трамп беше реизбран, фон дер Лајен предложи отворање преговори за купување повеќе американски течен природен гас (LNG). Но, ПОЛИТИКО објави дека САД, како одговор, не понудиле јасност за тоа како би функционирал договорот.
