Марк Карни, поранешниот централен банкар кој ја водеше реакцијата на финансиските кризи во САД и Велика Британија, ќе стане следниот премиер на Канада по победата на изборите за лидер на федералната Либерална партија, пренесува Гардијан. Карни, кој има 59 години, ја презема функцијата додека Канада е заглавена во потенцијално катастрофална трговска војна со САД, нејзиниот најблизок сојузник и најголем трговски партнер. Минатата недела Доналд Трамп објави данок од 25% на сите канадски производи, со исклучок за автомобилскиот и енергетскиот сектор. Тарифите имаат потенцијал да ја турнат канадската економија во рецесија. „Америка не е Канада. И Канада никогаш, ама баш никогаш, нема да биде дел од Америка, на кој било начин,“ изјави Карни пред своите поддржувачи, откривајќи ја егзистенцијалната криза која ги разгневи Канаѓаните, ја наруши долгогодишната врска со САД и ветува дека ќе биде главна тема за време на неговиот мандат како премиер. „Ние не ја побаравме оваа борба. Но, Канаѓаните секогаш се подготвени кога некој друг ги фрла ракавиците,“ додаде Карни. „Па нека не се залажуваат Американците – и во трговијата, како и во хокејот, Канада ќе победи.“
Пред објавувањето, заминувачкиот премиер Џастин Трудо ја воодушеви публиката, кажувајќи им на либералите дека е „проклето горд“ на наследството на неговата влада. Но, тој предупреди на опасно време за земјата. „Ова е момент што ја дефинира нацијата. Демократијата не е даденост. Слободата не е даденост. Дури ни Канада не е даденост,“ посочи Карни на своите поддржувачи. Со 85,9% од гласовите, Карни ги победи поранешната министерка за финансии Кристија Фриленд, поранешната лидерка на Владата Карина Гулд и поранешниот пратеник Франк Бајлис. Карни следеше необичен пат до власта: тој ќе биде само вториот премиер во историјата на Канада кој нема место во Домот на општините. Иако нема правило што го забранува тоа, според традицијата, се очекува Карни брзо да објави планови за кандидирање на федералните избори. Тој исто така ќе биде првиот либерален премиер од западна Канада – вреден идентитет во земја која е политички поделена по географски линии.
Карни поголемиот дел од кампањата се претставуваше како аутсајдер, и покрај неговите повеќегодишни врски со Либералната партија, вклучувајќи и работа како економски советник на Трудо, заминувачкиот премиер. Неговата убедлива победа, предвидена од успешното собирање средства и низа клучни поддршки од високи членови на кабинетот со големи организаторски мрежи, може да ги енергизира актуелните либерали. Во последните недели, партијата го прекина својот политички пад, забележувајќи остар пораст до тој степен што претходно очекуваното мнозинство на Конзервативната партија на следните општи избори изгледа сè поневеројатно. Промената во анкетите беше толку драматична што анкетарите имаат потешкотии да најдат историски преседан.
Во протечена меморандум, левичарската федерална Нова демократска партија неодамна ги предупреди своите членови дека Карни веројатно ќе распише предвремени избори во рок од неколку дена по победата на лидерските избори, користејќи ја својата зголемена популарност и спречувајќи ги опозициските партии да ја соборат Либералната влада преку гласање за недоверба. Дел од порастот во анкетите се објаснува со повторените закани од Трамп за анексија на Канада. Во анкетите, Карни се смета за најдоверлив федерален лидер кој може да ја води земјата низ актуелната трговска криза, благодарение на неговото обемно економско искуство. „Мојата влада ќе ги задржи тарифите сè додека Американците не ни покажат почит,“ изјави Карни.
