Ако се погледнат подетално податоците за 2024 година месец по месец, според статистиката на Народната банка, најголем дел од вкупните директни инвестиции се забележани во месеците март, април (пред изборите во 2024 година) и јули (по изборите). Министерот за транспорт и вицепремиер Александар Николоски, денеска од Охрид се пофали дека странските инвестиции во Македонија минатата година надминале една милијарда евра. Како што соопшти министерството за транспорт во краткото соопштине за медиумите,, Николоски очекува овој тренд на зголемување да продолжи. Вицепремиерот и министер за транспорт во изјавата вели дека бројките од Заводот за статистика за 2024 година, кои патем сè уште не се објавени, покажуваат оти минатата година ќе биде рекордна година по привлекување странски инвестиции „во смисла на вредност на истите“. „Ќе надминеме за прв пат во историјата на Македонија преку 1 милијарда евра, а оваа година очекувам истиот тренд да продолжи“, истакнал Николоски додавајќи оти тоа не значи само нови инвеститори туку и зголемување на капацитетите на постојните инвеститори. Николоски оваа изјава ја дал за време на настанот за добавувачи што се организира во Охрид во рамки на Групацијата Костал. Заедно со вицепремиерот е и Виткор Мизо, директор на Костал Македонија, но и претседател на Советот на странски инвеститори. Бидејќи во моментов во базата на Државниот завод за статитика не се јавно достапни податоците за странски инвестиции во 2024 година, се обидовме да ја потврдиме бројката која ја спомена министерот Николоски. Така, податоците од Народната банка на Северна Македонија покажуваат оти расположивите бројки за вкупни директни инвестиции до септември 2024 година навистина се рекордни. Минататата година во првите три квартали се забележани вкупни директни инвестиции од 838 милиони евра. Треба да се напомене дека во овие инвестиции влегуваат и сопственичкиот капитал, реинвестирањето, и долговите.
A Flourish chart
Ако се погледнат подетално податоците за 2024 година месец по месец, според статистиката на Народната банка, најголем дел од вкупните директни инвестиции се забележани во месеците март, април (пред изборите во 2024 година) и јули (по изборите).
Пред една недела, токму Мизо, имаше презентација пред медиумите каде ги прикажа резултатите од годишната анкета на најголемите странски инвеститори во земјата.
Според резултатите, повеќе од 60 отсто од странските инвеститори во земјава имале намален број на нарачки и недостаток на работна сила во 2024 година во споредба со првичните планови. Најголемите препреки во нивните бизниси во 2024 година биле недостатокот на квалификувана работна сила и зголемените оперативни трошоци. Препреки претставуваат и бирократијата и неконзистентноста, правната несигурност и честите промени во бизнис регулативата, но и корупцијата и проблемите со правосудството. Во меѓувреме една голема ирско-американска компанија „Аптив“ најави оти си заминува од земјава и го затвара погонот во ТИРЗ Бунарџик каде има 500 вработени. Исто така, и најголемиот извозник од земјава, британската „Џонсон Мети“ најави дека ќе го намали бројот на работници. Премиерот Христијан Мицкоски во изјава за медиумите рече оти повеќе е загрижен дали Македонија ќе има доволно работна сила за новите инвеститори кои само што не дошле во земјава, отколку за заминувањето на „Аптив“. Извор: Новинска агенција МЕТА
