Република Северна Македонија, претставена преку министерот за европски прашања, Орхан Муртезани и заменик министерот за надворешни работи и надворешна трговија, Зоран Димитровски, по денешната церемонија на примопредавање напретседателството со Стратегијата на Европската Унија за Јадранско-јонскиот регион (ЕУСАИР) на Крит, од денес претседава со Јадранско-јонската иницијатива и ЕУСАИР. Министерот Муртезани, на церемонијата на примопредавање нагласи дека интеграцијата во Унијата не претставува само надворешна политика, туку, дека тоа е приказна на една генерација, потенцирајќи дека улогата на Северна Македонија во ЕУСАИР не е симболична, туку суштинска. Во обраќањето пред регионалните партнери и претставници на Европската комисија, Муртезани најави дека новото Претседателство ќе се фокусира на поврзаноста како двигател на развојот: „Поврзаноста не се мери само со километри автопати или гигабајти интернет. Таа се мери и со довербата што ја градиме едни кон други,“ рече тој.
Како координирачка земја на Столб 2 – Поврзување на регионот, Северна Македонија ќе работи на зајакнување на инфраструктурните, дигиталните и социјалните врски меѓу земјите во Јадранско-јонскиот регион: „Ќе градиме не само патишта, туку и мостови на разбирање и солидарност.“ Претседателството ќе се фокусира и на одржливиот развој, иновациите и сината економија, продолжувајќи ги приоритетите воспоставени од Грчкото претседателство. Во продолжение следи интегралната изјава на МЕП Орхан Муртезани од церемонијата на примопредавање на Претседателството од Грција на Северна Македонија: Почитувани колеги, почитувани пријатели, Постојат земји чии придонеси во европската приказна се длабоко вкоренети и во историјата, и во нивната континуирана посветеност. Грција е една од тие земји. Таа е широко препознаена не само како лулка на демократијата, туку и како држава што доследно ја поддржува европската траекторија на регионот. Во Солун, во 2003 година, европската иднина на Западен Балкан стана заедничка заложба. Оттогаш патот не беше без предизвици, но визијата поставена тогаш, сè уште продолжува да нè води. Денес, Грција има клучна улога во поддршката на таа визија, и го признаваме значајниот придонес на нашите грчки колеги во унапредувањето на европската перспектива на регионот.
Токму затоа е соодветно што ова примопредавање го одбележуваме овде, во Грција – таму каде што историската длабочина се преплетува со современата соработка. Изразуваме благодарност до грчкото претседателство за неговото посветено водство во изминатата година. Со фокус кон проширувањето, социјалната кохезија, еколошката отпорност и иновациите во сината економија, претседателството даде јасна насока и обезбеди континуитет на Стратегијата. Лидерството на Грција во овој период уште еднаш ја потврди вредноста на макрорегионалната соработка како платформа за усогласување не само на политики, туку и на заеднички приоритети.
За Северна Македонија, ова е историски момент. Прв пат, од приклучувањето и кон Стратегијата и кон Иницијативата, ги преземаме претседателската улога и претседавањето. Оваа транзиција, која следува пет години по приклучувањето кон Стратегијата и седум години по вклучувањето во Иницијативата, претставува природен и заслужен чекор напред на патувањето обликувано од партнерство и истрајна посветеност. Во оваа улога влегуваме со целосна свесност за одговорноста што ја преземаме и со јасна посветеност да водиме на начин кој ги вклучува сите. Во нашата координација на Столб 2, Поврзување на регионот, ќе се фокусираме не само кон градење инфраструктура, туку и кон градење доверба. За нас, поврзаноста не се ограничува само на транспорт или технологија, туку претставува начин за приближување на амбицијата и можностите.
Западен Балкан е регион чиј европски сон и понатаму е длабоко врежан во срцето. За нас, интеграцијата не е само поглавје од надворешната политика, туку приказна на една генерација. Стратегиите како ЕУСАИР не се само споредни рамки, туку клучни мостови што водат кон постигнување на таа цел. Ова примопредавање не е церемонија, туку продолжување – продолжување на заедничките напори, заедничките вредности и заедничката иднина. Им благодариме на нашите грчки пријатели за нивната улога во оформувањето на правецот што го следиме и ве покануваме сите вас да чекориме заедно во годината што претстои: со доверба, со амбиција и со единство.
