Новоформираното Министерство за јавна администрација на 3-ти овој месец официјално правно формално се регистрираше во Централниот регистар, но според министерот Горан Минчев деновиве ќе чека Министерството за финансии да предложи ребаланс на буџетот до Собранието до крајот на месецов за да располага со свој буџет од околу милион денари до крајот на годинава. Министерството за јавна администрација при трансформацијата на претходното Министерство за информатичко општество и администрација остана без свој буџет откако буџетските средства припаднале исто така на новоформираното Министерство за дигитална трансформација.
Добиј ги најважните вести, бесплатно на Viber
Како што информираше министерот Минчев со трансформацијата на МИОА и по анкетата за изјаснување меѓу вработените 58 вработени останале се во МЈА, а околу 160 во Министерството за дигитална трансформација. Според претходната систематизација во МИОА имало 540 вработени, а со новата систематизација двете министерства ќе функционираат со 420 вработени, но министерот вети дека иако се намалуваат работните места никој од вработените нема да остане без работа.
Министерството за јавна администрација веќе ја започна формално правната постапка за повлекување на законите од надлежност на МЈА кои се веќе во собраниска процедура поднесени од претходната влада. Предлог законот за административни службеници, предлог Законот за вработени во јавниот сектор и Законот за стручно усовршување и обука на административните службеници потоа ќе одат на јавна расправа, да се слушнат мислењата на сите засегнати страни, синдикатите, невладниот сектор, граѓанските организации и опозицијата, а меѓу прашањата кои ќе бидат на дебата е и прашањето на покачувањето на платите на административците:
-Имав неколку средби со синдикатите и прашањето за платите е клучно што нив ги интересира и практично актуелното покачувањето од 15 проценти не е доволно за нив и дефакто тоа е еден од клучните проблеми за нив. Состојбата во буџетот во овој момент е катастрофална и затоа отвораме една дебата со која би сакале да дојдеме до некое компромисно решение, но во овој момент ние немаме пресек во каква состојба и каква кондиција е буџетот за да разговараме за конкретно за процентот на висина на зголемување на платите. Има неколку решенија, но го оставаме за дебата – рече Минчев.
Новата влада веќе најави дека ќе го укине балансерот, а се ревидира и работата на укинатото МИОА од каде од 58 вработени кои останале во Министерстото за јавна администрација 43 проценти се од етничките заедници.
-Дигиталната алатка балансер во минатото беше предмет на злоупотреби. Имавме случаи каде етнички Македонци се пишуваа Албанци, или етнички Албанци се пишуваа Македонци, и случаи кога припадници на други етнички заедници се пишуваа Македонци. Конкретно еве во новото министерство за јавна администрација, 43 проценти се од етничките заедници. Балансерот ќе биде укинат и тоа ќе тече во неколку фази. Бројките веќе се сменети и ќе се однесуваат на резидентното население согласно последниот попис на население во 2021 и така ќе се применува и тоа е завршена работа. Новото законско решение кое може да ги засега токму овие закони кои сега ги повлекуваме Законот за административни службеници и Законот за вработени во јавниот сектор ќе отвориме дебата и врз база на таа ќе предвидиме законски решенија, но во овој момент решението е такво – нагласи Минчев.
Министерот се заложи дека нема да се носат е брзи закони кои ќе бидат„нашминкани“ и недоволно добри, туку ќе се оди со системски решенија кои ќе бидат применливи, со примена на акциските планови на ЕУ и роковите кои се зададени во нив, но многу е важно, процесот да биде отворен за дебата на сите засегнати страни.
-Да не бидат законските решенија како досега, под капата на европско знаменце, брзо донесени, а неприменливи, каде сите засегнати страни се незадоволни. Свесен сум дека не можеме да имаме идеално решение, но ќе се потрудиме да направиме некаков компромис којшто ќе биде интерес на сите, а најважно од се е да се дадат системски и долгорочни решенија коишто ќе имаат своја примена, рече Минчев додавајќи дека крајната цел е професионална, департизирана и мотивирана јавна администрација.
Тој се надева дека овие закони и претходно биле предвидени да стапат на сила од јануари 2025 година и можно е да се испочитува тој рок за донесување на три закони од надлежност на МЈА. Како добар законски текст го посочи предлог Законот за стручно усовршување и обука на административните службеници со кој за првпат е предвидено формирање на Агенција за стручно усовршување и обука на административците, но дилемата е дали да биде орган во состав на МЈА или Агенција под владата.
-Најважно од се е да створиме кадар. Да бидеме реални, имаме недоволно едуциран кадар во администрацијата, а со тоа е неквалитетна услугата којашто ја дава јавната администрација кон граѓаните, тоа сакаме да го подобриме. Главните двигател на законите е имплементацијата. Имаме низа на добри закони во сите областа на државата, но имплементацијата не е на соодветно ниво, рече Минчев и додаде дека сите квалитетни работи кои ги нотира ЕУ ќе останат во новите законски решенија.
