Премиерот во интервју на сцената на конференцијата на конзервативците ја критикуваше Европа, а модераторката забележа дека Мицкоски бил единствениот лидер од Европа кој ракоплескал на говорот на американскиот потпретседател Џеј Ди Венс на Минхенската безбедносна конференција. На говорницата на Конференцијата за политичка акција на конзервативците, најголемиот десничарски годишен собир во Вашингтон, македонскиот премиер Христијан Мицкоски зборуваше за поддршката од Македонија и нејзината усогласеност со политиките на администрацијата на Доналд Трамп, за важноста на стратешкото партнество со САД, како и за улогата на земјата во борбата против илегалната миграција.
Мицкоски беше интервјуиран од политичката коментаторка Кеј Ти Мекфарланд, која беше заменик-советничка за национална безбедност во првиот мандат на Трамп. Таа го претстави македонскиот премиер како поддржувач на Доналд Трамп уште пред тој да биде избран за претседател на САД, а Македонија како еден од големите стратешки партнери на Америка. Мицкоски наведе дека Македонците во САД силно го поддржале реизборот на Трамп, како традиционални и семејно ориентирани гласачи. Мекфарланд потоа забележа дека премиерот Мицкоски бил единствен меѓу европските лидери кој позитивно реагирал и аплаудирал за време на обраќањето на американскиот потпретседател Џеј Ди Венс на Минхенската безбедносна конференција. Говорот на Венс, во кој тој жестоко ги критикуваше европските земји, наиде на бура од негативни реакции меѓу американските сојузници во Европа.
„Тоа беше историски настан, според моето скромно мислење. Не велам дека сум во право, можеби некои европски политичари ќе ми се налутат, но тоа беше инспиративен говор. Важно е дека по говорот, некои од публиката го критикуваа Венс, а некои рекоа дека тоа било своевидно мешање во внатрешните работи на суверени држави, бидејќи потпретседателот Венс наведе многу примери кои не се во согласност со слободата на говорот, со демократијата, со нашите споделени вредности. Повторно ќе речам, мислам дека беше во право“, рече Мицкоски.
Коментирајќи ги изјавите на некои од присутните дека говорот на Венс бил мешање во внатрешните работи на суверени земји, Мицкоски рече дека на панел-дискусија во Минхен потсетил на фактот дека од почетокот на независноста, заради остварување на стратешките цели да биде полноправна членка на НАТО и на ЕУ, Македонија ги смени своето знаме, својата валута, своето име и својот Устав, поради тоа што некои наши соседи го злоупотребиле своето членство во овие организации за да наметнат билатерални барања.
– Ако ова не е мешање во внатрешни работи на една суверена земја, тогаш што е? За што зборуваме ние? – праша Мицкоски.
Тој рече дека нашата држава сега е повторно под притисок да го смени Уставот.
– Тоа не е фер. Не е фер кон една мала земја која сака да стане членка на ЕУ. Вредностите на ЕУ не се билатерализација на пристапниот процес – рече Мицкоски. Модераторката го нагласи фактот дека за разлика од повеќето големи европски земји кои „имаат големи барања од НАТО, но не ги подмируваат своите сметки“, Македонија, иако мала земја, дава еден од најголемите придонеси во НАТО од брутодомашниот производ по глава на жител.
– Нашиот придонес е над два проценти. Ние сме целосно усогласени и ја поддржуваме политиката на претседателот Трамп – рече Мицкоски.
На геополитички план, Мицкоски ја истакна важноста на Македонија за транспортните и енергетските коридори во Балканот. Тој беше прашан за зголемувањето на кинеското влијание во изградбата на регионалната инфраструктура.
„Во право сте кога ја спомнувате таканаречената „кинеска економска инвазија“ на овој дел на Европа. Ние сме под силен финансиски притисок од таа земја, но мојата земја е единствениот дел од сложувалката кој им недостасува. Ние сме природен крстопат на два важни европски коридори, 8 и 10. Практично двата коридори се сечат на територијата на мојата татковина. Бидејќи ние сме стратешки партнери со САД, јас сум многу заинтересиран да поканам што е можно повеќе инвеститори – американските бизнисмени се веќе присутни во мојата земја – и можат да бидат силна конкуренција на огромните азиски компании во регионот“, изјави премиерот Мицкоски.
