По реакцијата на тетовскиот сојуз на борци, на СДСМ, Левица и на ВМРО-ДПМНЕ, владејачката партија Беса, од која доаѓа тетовскиот градоначалник Билал Касами, ретерира дека ќе ги менува имињата на тетовските улици без консензус и Бадентерово мнозинство во Советот на Општината. Владејачката Беса ретерира дека ќе ги менува имињата на тетовските улици без консензус и Бадентерово мнозинство, откако борците од НОБ и македонскиот политички блок реагираа дека нема да дозволат улици да се именуваат по поранешни припадници на ОНА и на балисти. Претседателот на Комисијата за промена на имињата на улиците при Општина Тетово, Арѓенд Велиу, за „Слободен печат“ вели дека без консензус ќе нема промена на имиња на улици и дека не е точно дека веќе има изготвено список со нови имиња. Од Владата му порачаа на тетовскиот градоначалник и владин партнер Билал Касами дека предлогот нема да му помине. Опозициските СДСМ и Левица, како и владејачката ВМРО-ДПМНЕ, се децидни дека без Бадентерово мнозинство нема да се именува и да се преименува ниту една улица во Тетово.
Влада: Tоа не е дел од коалицискиот договор – Касами си тера своја агенда и тоа не е дел од коалицискиот договор. Таков предлог доколку дојде на владино разгледување, нема да биде прифатен – велат од Владата за „Слободен печат“. Велиу, иако неодамна за медиуми на албански јазик изјави дека од 297 улици само 81 имаат имиња, додека другите 216 се без имиња или имаат броеви, за „Слободен печат“ е крајно воздржан. – Допрва ќе се распише јавен повик, по што ќе има и јавна дебата за имињата на улиците. Не е точно дека има готов список со имиња. Од Сојузот на борци од НОБ зборуваат во ветер. Ништо не е одлучено и муабети од пазар се дека имињата се веќе утврдени. Не паѓајте на провокации, јасно е дека ќе се бара консензус за промена на улиците – ни изјави Велиу.
Наспроти ова, советникот од Алтернатива Фатон Селами неодамна откри неколку предлози за имиња на улици, меѓу кои и Фадил Сулејмани, но и историски личности, како Скендербег, Исмаил Ќемали, браќата Фрашери. Селмани вчера не ни одговори на телефонските повици. Според борците од НОБ, тетовскиот градоначалник Касами, најавил дека ќе бара консензус, но и дека ако тој не се постигне, односно ако македонските партии одбијат да бидат дел од процесот, тоа ќе го толкува како нивна согласност и дека за преименувањата не е потребно Бадентерово мнозинство.
По јавниот повик за нови имиња на улиците, ќе биде појасно дали Касами со вакви теми само се обидува да го крене рејтингот пред локалните избори, откако веќе потврди дека ќе атакува на втор мандат за градоначалник на Тетово, по што ќе ретерира затоа што му се потребни и македонски гласови. Тетовските советници од ВМРО-ДПМНЕ за „Слободен печат“ се категорични дека не прифаќаат преименување на улиците во Тетово. – Прифаќаме именување на 40 улици што се со броеви и имињата на тие улици да бидат пропорционално застапени, но не и преименување на улиците. Не прифаќаме имиња на улици според поранешни команданти на ОНА. Ако градоначалникот проектот го турка без Бадентерово мнозинство, тогаш нема да му помине на Влада – велат за „Слободен печат“ од советничката група на ВМРО-ДПМНЕ. Сметките за струја нема каде да стигнат, улиците со броеви, куќите и без нив. Оттаму додаваат дека Касами именувањето на улиците сака да го протне како техничко прашање, бидејќи има улица под број 100, но куќите на таа улица немаат броеви, па сметки за струја, на пример, доаѓаат кај едно домаќинство, и тоа прави проблем. Според нив, ако преименувањата ги турка на сила, Касами на изборите не треба да се надева на македонски гласови.
Од СДСМ најавија дека нивните советници ќе се спротивстават на предлогот за преименување на улиците во Тетово по иницијатива на градоначалникот Касами. Социјалдемократите бараат власта да преземе мерки против идејата на нивниот коалициски партнер за промени на називите на инфраструктурните објекти во Тетово кои носат имиња од антифашистичкото минато. – На вредностите од НОБ и од антифашизмот почива современата македонска држава. Какво било бришење на најсветлите страници на македонската историја, значи удар врз темелот на кој почива државата. Значењето на партизанската борба и на нејзините идеали никој не смее да ги омаловажува, брише и пребришува – вели Андријана Томовска од СДСМ.
СДСМ побара премиерот Христијан Мицкоски да го повика Касами да се повлече од предлогот, а советниците на ВМРО-ДПМНЕ да бидат против.
Претседателот на СДСМ Венко Филипче изјави дека за именување улици, потребен е широк консензус. – Не може сериозни групи граѓани, како што е Сојузот на борци од Тетово, да се игнорираат. Не може, затоа што тие луѓе се вградиле во градењето на историјата на оваа земја. Не може некој тукутака, со гума, да ги избрише. Нека се отвори дебата, па ќе видиме што ќе биде резултат од таа дебата – рече Филипче. И Левица побара ВМРО-ДПМНЕ како коалициски партнер на Вреди да го спречи Касами да преименува „повеќе од 200 тетовски улици, со што се наметнува големоалбански шовинизам и се брише антифашистичката историја на македонската држава“. – Според неофицијални информации, меѓу имињата што се заменуваат се и имињата на истакнати македонски антифашисти, како Страшо Пинџур, Благоја Тоскоски Тоска и Радован Цониќ, кои сега се заменуваат со имиња на фашистички колаборатори. Потсетуваме дека ваквите тенденции се спротивни на Законот за определување имиња на улици, плоштади, мостови и други инфраструктурни објекти, каде што јасно се наведува дека имињата не смеат да го нарушуваат угледот на Република Македонија, да навредуваат национални чувства на граѓаните или да го загрозуваат меѓуетничкиот соживот, јавниот морал и обичаите – велат од Левица.
По најавата за преименување на улиците, Општинската организација на Сојузот на борците од НОБ од Тетово остро реагираше и го предупредува градоначалникот Касами дека со најавената промена на имињата на улиците и отстранувањето на имињата на борците од НОБ и од антифашистичката војна, лесно може да ја отвори Пандорината кутија и да дојде до меѓунационална нетрпеливост. Борците од Тетово, но и граѓаните од македонска националност од Тетово, велат дека на списокот ќе се најдат имиња на Албанци што учествувале во конфликтот од 2001 година, како и имиња што немаат никаква поврзаност со Македонија и со Тетово. „Почитуван Билал Касами, како градоначалник на Општината, вие по Устав, закон и здрав разум, сте градоначалник во служба на сите граѓани што живеат во Општината, за која сте добиле чест и доверба да ја предводите. Определувањето имиња на улиците не е инструмент со кој можете политички да профитирате, туку е отворање на Пандорината кутија, од која може да излезат големи непријатности за сите“, се вели во писмото до Касами од борците од НОБ. Тие апелираат до членовите на Советот на Општина Тетово навреме и јавно да излезат со свој став против какво било преименување на улиците што носат имиња на национални дејци од антифашистичкото минато на македонскиот народ и народностите, меѓувековните борби за државност, на нашите сојузници од антифашистичката коалиција, како и против какво било именување улици и инфраструктурни објекти со имиња на личности, настани и датуми што слават фашистичка, терористичка, милитаристичка или радикална личност, односно група.
