Драги прилепчани добрa вечер,Добрa вечер за градот херој, за луѓето кои секогаш биле на страната на Македонија.Еве не на една година од нашиот мандат. Не се затворивме во канцеларии, макадамот не го заменивме со дебелите килими и удобните фотелји. Таа врска со народот на ВМРО-ДПМНЕ секогаш ќе трае. И ќе ви кажам искрено, секогаш е подобро помеѓу својот народ. Помеѓу луѓето на Македонија кои најдобро чувствуваат, кои знаат да прекорат, но и знаат кој е за што, кој искрено се бори и како вистински стојат работите.
И во оваа година што помина минавме заедно низ многу премрежја. Не почнавме од нула, веќе слушнавте, почнавме од минус. Тој минус значеше да исплаќаме заостанати плати, заостанати субвенции, да се бориме, да застанеме на нозе, да ги исправиме работите.
И знам дека секој почеток е тежок. Секој нов почеток е уште потежок, затоа што наследуваш веќе стекната состојба и како што народот вели, не почнуваш од нула, туку од минус. И повторно градиш темели, одново поставуваш столбови и ги засилуваш носечките кои дотогаш биле дотраени, кршени, рушени. Тие нови темели стануваат фундамент на новата иднина која заеднички ја градиме, тие нови темели се секојдневната борба за тебе и твојата иднина. Тие темели треба да го донесат времето на Македонија, време кое допрва доаѓа. Најдоброто кое допрва ќе се случи. Она што сите го очекуваме, сакаме, заслужуваме и за кое секој ден, се трудиме и чекор по чекор се бориме. Земја на просперитет, ред, развој, почит, човечност, вредности. Земја со која ќе се гордееме, земја која ќе биде на вистинскиот пат, повторно твоја и ќе работи за тебе.
1 година од новиот почеток,1 година повторно градење темели,Оваа година година беше за тебе, беше за сите нас!Кога ќе погледнам во очите на луѓето кои секојдневно ги среќавам, знам дека морам да направам сè што можам за да имаат подобар живот. Така и ја гледам Македонија – со љубов и одговорност. За тебе, за твоето семејство, за иднината што ја градиме заедно, за надежите кои не смеат да бидат изневерени.
Промените не се случуваат преку ноќ, но секој ден што вложуваме е чекор поблиску до Македонија со која ќе се гордееме. Не ветувам совршенства и чуда, туку ветувам искреност и упорност во секој чекор и борба за тебе и иднината каква што ја заслужувате.
И каква иронија. За опозицијата повторно Македонија била понижена, тоа е нивната слика и нивната идеја, тоа е нивниот слоган. За нас пак, Македонија секогаш била света работа, горда, исправена и нашата борба е таа да биде повторно ваша.Нивната понуда е хаос, насилие, безидејност. Нашата е работа, упорност и непоколеблива волја да покажеме дека најдоброто допрва доаѓа.
Јасно е дека разликата е голема.Од минусно салдо на раст на БДП и последни во Европа за да денес имаме раст на БДП од 3.2% во првиот квартал од оваа година и да бидме 4та економија во Европа според тој раст на БДП.Од последни во Европа по директни странски инвестиции, до први во Европа со 1 милијарда и двесте педесет и пет милиони евра што е најдобар резултат од независноста до денес.
Од двоцифрена инфлација до ниска од 2.7% за месец март. Порано растеа само платите на функционерите, а денес растат платите на работниците од 9 до 10 проценти на годишно ниво. Од индустриското производство коешто беше минус 2%, до раст на истото тоа индустриско производство во март од 5.2%. Од автопат Кичево-Охрид кој стагнираше, и беше најважно подизведувачите да се од Кичевски Зајас или струмичко до автопат кој се гради и кој за една година ќе биде готов. Од купување на трговски центри, соравии, до работа на експресен пат за Прилеп и автопат за Битола. Затоа што нема повеќе тендери во 4 очи и денес има одговорност.
Од руинирани и запустени студентски домови, до студентски домови кои се градат и осовременуваат.Од срамни и штетни договори до стратешко партнерство со Обединетото Кралство и Северна Ирска.Од одземена и обезличена Македонија до Македонија која е повторно ваша, и кажува што сака и за што се бори. И затоа велиме дека времето на Македонија допрва доаѓа!
Драги пријатели,Денес темата на денешната трибина е економија и дигитализација, и овде слушнавте направивме многу за една година во тешки условите услови во кои работевме.Обезбедивме над 500 милиони евра поддршка за компаниите за реализација на инвестиции и за поддршка на општините за реализација на капитални проекти за подобрување на животот на граѓаните. Тоа кое што го зборувавме во опозицијата тоа го работиме и кога ја преземавме Владата.
Обезбедивме раст од тие 3,2% за кои што зборувавме. По седум години намален е јавниот долг, и заклучно со март 2025 година има намалување 4,7 процентни поени во однос на БДП. Буџетскиот дефицит е намален на ниво од 4%.Платите растат, повисоки плати за администрацијата, здравството, образованието, полицијата, културата.
Целосно е отплатена , како што слушнавте, таа Еврообврзница која што тогашната влада на СДСМ и ДУИ, предводена од зоран заев ја зема во 2018 година од точно половина милијарда евра. Намалување на царинските стапки за 67 стоки кои како суровини и репроматеријали се користат во домашната индустрија и целосна либерализација на увозот на стоки со потекло од САД како наш стратешки партнер.120 нови услуги за граѓаните на националниот портал uslugi.gov.mk.
Признавање на електронските документи како целосно валидни.Државата за прв пат добива Закон за безбедност на мрежи и информациски системи.Се подготвува издавање во електронска форма личната карта и возачка дозвола. Се спроведе забраната за 226 нелегални приредувачи на онлајн игри на среќа.И она што е важно за Прилеп, обезбедивме и исплативме над 9 милијарди денари заостанати субвенции за земјоделците.
По претходно спроведена постапка, обезбедени се вкупно 967 договори за закуп на земјоделско земјиште во државна сопственост со вкупна површина од околу 2.700 хектари.Откупувачите на тутун ја дополнија откупната цена од 375 на 400 денари за откупен тутун прва класа за минатата година, а исто така Владата ја зголеми субвенцијата од 80 на 100 денари за килограм.
Ќе направиме, почитувани прилепчани уште многу работи заедно. Свесен сум дека се живее тешко и нашата желба е тоа да го смениме.Затоа во наредниот период ќе бидат објавени две мерки.
Првата, во рамки на мерката за поддршка за самовработување, предвидуваме 7.000 евра по лице, за самовработување на младо лице до 29 години предвидуваме неповратна поддршка од 10.000 евра, додека за здружување на корисници до две лица да основаат бизнис, висината на финансиска поддршка изнесува од 14.000 до 20.000 евра при што 20.000 евра се однесуваат на содружници кои се до 29 години. Ова е многу важно за младите претприемачи кои што сакаат да почнат бизнис.
На овој начин обезбедуваме поддршка на приватната иницијатива и поттикнуваме што повеќе луѓе ова да го користат.Втората мерка, Вработување и раст на правни субјекти каде предвидуваме да се опфатат 1720 лица, иако како што кажа министерката за финансии досега се отворени нови речиси 15000 работни места, откако оваа Влада е избрана.
На овој начин ќе се олесни процесот на вработување и придвижување на процесите.Наследивме систем што се кршеше и паѓаше, институции што изгубија доверба, луѓе што изгубија верба.Но, не се предадовме. Не го оставивме својот дом во рацете на минатото.Ги ставивме првите тули на новите темели, со посветеност и љубов кон секој човек, секоја заедница, секој сон. Ги поставивме столбовите што ќе го издржат товарот на иднината. Ги засиливме носечките што ќе ја држат оваа земја исправена и горда.
Овие темели не се само тули, или камења и бетон. Тие се секој наш збор, секој наша капка пот и секој чекор што го правиме за тебе, за твоето семејство, за твојата иднина.Овие темели се твојата доверба, твојата борба, твојата вера дека Македонија заслужува повеќе – заслужува правда, ред, развој и почит.Тие темели се почеток на новата ера. Време кога Македонија повторно ќе биде твоја – земја на можности, земја на човечност и вредности, земја во која секој ќе може да се гордее.
Ние не ветуваме брзи решенија, затоа што знаеме дека вистинските промени бараат време, трпение и упорност. Но, знаеме и дека секој ден на напредок е ден на победа.Секој ден е борба за достоинство, за иднината што ја заслужуваме. За децата што ќе растат во безбедна и чесна земја. За сите нас што веруваме дека можеме и мораме подобро.
Оваа година беше година на напорна работа, на посветеност и враќање на доверба, консолидирање на состојбата и стабилизација. Година во која секој од нас даде дел од себе за да го изгради новиот пат на Македонија, година во која свесни за огромните очекувања и досега многупати изневерените надежи, ние се трудевме да направиме стабилизација која ќе потткне развој, консолидирање кое ќе донесе раст.
Затоа, дрги прилепчани, денес гледаме напред со увереност и со срце полно надеж. Времето на Македонија допрва доаѓа!Време кога ќе ги оживееме нашите соништа, кога Македонија ќе се издигне посилна и посветла од кога било.Време кога твојот глас, твојот труд и твојата иднина ќе постојат како нераскинлив дел од нашата политичка и животна приказна и заложби.
1 година од новиот почеток, 1 година градење темели, 1 година посветена на тебе.Заедно сме силни, заедно ја создаваме Македонија што ја сакаме и ја заслужуваме.Времето на Македонија допрва доаѓа – и ја градиме тврдината на довербата, земјата на развојот, го градиме секој чекор, секој поединечен сон.Да сте живи и здрави.Бог да го благослови Прилеп, и Бог да ни ја благослови нашата Македонија.Ви благодарам.
