Најавата за можна промена на државниот грб уште на почеток ги подели партиите и клучното прашање е дали и доколку ВМРО-ДПМНЕ обезбеди двотретинско мнозинство ќе ја турка иницијативата без обезбеден консензус. Откако премиерот Христијан Мицкоски потврди дека со Вреди го отворил прашањето за промена на грбот, засега јасно е само дека отворање на Уставот само за тоа прашање ќе нема. Владејачката Вреди и опозициската ДУИ сакаат промена на грбот, но во пакет со други барања. Владиниот партнер ЗНАМ досега не е прашан, па нема ни став, додека опозицискиот СДСМ најави дека жестоко ќе се спротивстави на каква било промена на државниот грб. Ако Мицкоски е решен да ја турка иницијативата, прво ќе треба да ги испегла позициите во сопствениот владин двор, па потоа да се потруди да го убеди и Филипче за промена на државниот грб. Промена што би била одраз на сегашната реалност. Билал Касами, еден од лидерите на Вреди, вели дека поддржува секакви промени на Уставот, со кои ќе се менуваат државните симболи, поврзани со минатиот општествено-политички систем и дека се потребни пакет измени. Тој додава дека поддржуваат промени на Уставот, со кои би се рефлектирала сегашната реалност на државата.– Јас, впрочем, во еден претходен мој јавен настап сум кажал дека и една од целите за именување на улиците во градот Тетово, беше тоа што уште стои наследството од минатиот систем, што е и образложението на премиерот во делот на менување на грбот на државата. Ние сме подготвени да разговараме за еден пакет на уставни измени, каде што наместо наследството од претходниот систем, ќе рефлектира сегашното ориентирање на државата кон Европската Унија. Ние сме подготвени да разговараме сигурно дека тоа ќе биде и јавен транспарентен процес – рече Касами.
Висок владин функционер од Вреди за „Слободен печат“ вели дека покрај нов грб, потребна е и нова химна и промена на формулацијата „20 отсто“ со албански јазик.– Точно е дека грбот и химната се влечат од комунизмот. Точно е и дека 20 проценти е понижувачки за албанскиот јазик. Ги разговараме овие теми, но сега приоритет е спроведување на владината програма и приоритетите, како што се евроинтеграцијата, правната држава, економскиот развој, децентрализацијата – вели функционерот. Висок владин функционер од ВМРО-ДПМНЕ за „Слободен печат“ вели дека ако има договор за промена на грбот, Уставот би се отворил само за тоа прашање. Отворањето на највисокиот правен акт во државата не е врзано со внесот на Бугарите во Уставот, ниту, пак, со Вреди се разговарало за промена на формулацијата „20 отсто“ со албански јазик или за нова химна. Од ЗНАМ велат дека Мицкоски досега со нив не го отворил прашањето за промена на грбот и дека откако премиерот отворено ќе зборува на таа тема, тие ќе го кажат ставот.
Освен Вреди, отворање на Уставот во пакет бара и опозициската ДУИ. Висок функционер од ДУИ за Слободен печат“ вели дека се подготвени да дебатираат за промена на грбот, химната, за промена на формулацијата „20 отсто“ со албански јазик, но и за национално знаме на Македонците кое би се разликувало од државното знаме. Според функционерот, добро е да се постигне консензус за промена на државните симболи што треба да бидат прифатливи за сите граѓани и етнички заедници, а Македонците да изберат национално знаме за државното знаме да биде почитувано од сите граѓани и заедници. СДСМ е „жестоко против“. Наспроти подготвеноста на албанскиот политички блок за промена на државните симболи, против промена на грбот жестока реакција најави лидерот на СДСМ, Венко Филипче. – Сметаме дека државниот грб сосема соодветно, прво хералдиски ги отсликува сите карактеристики на ова поднебје. Јасен е континуитетот и придобивките од Народноослободителната и антифашистичка војна. Нема никаква поделба во однос на етнички групи и доколку има таква иницијатива со сите демократски средства најостро ќе се спротивставиме на промена на државниот грб – изјави Филипче.
Според него, ова е уште еден од низата ненајавени и испланирани предлози на ВМРО-ДПМНЕ, што се повторува од претходно. – Тоа е еден предлог што сега се повторува. Да потсетам дека тој предлог беше на маса пред повеќе години, за време на минатата влада, кога беа во коалиција заедно со ДУИ. Тогаш беше дел од еден пакет мерки што требаше да се донесе. Конкретно, сметам дека првата дилема што се поставува е дали можеби внатре, во коалицијата со Вреди, давајќи го овој предлог за измена на државниот грб, не се разговара и за измена на химната. И тоа е нешто на што ВМРО-ДПМНЕ треба да одговори – рече Филипче. ЛДП: Рисот како препознатлив вид да биде на новиот грб. И додека партиите лиферуваат предлози за отворање на Уставот, при што освен грбот би се менувале и другите државни симболи, ЛДП е за промена на грбот и веднаш излезе со предлог рисот да биде симболот за препознавање на македонскиот грб. – Поставување на рисот на новиот грб, како препознатлив вид, карактеристичен токму за нашата држава. Рисот како симбол се наоѓа на металната петденарка, се најде на националниот фудбалски дрес, но и на уште многу други места и е заштитен со голем број меѓународни конвенции. Доколку се постави рисот, се покажува поглед кон иднината наместо враќање назад и гледање во минатото. Тоа е симбол што со ништо нема да потсетува на која било соседна држава и да создаде проблеми. Прифатлива е само уникатност, посебност, новина, свежина, иднина и заштита на своето, како што е балканскиот рис, кој потекнува од Шар Планина, е ретко и заштитено животно, и е еден од нашите национални државни симболи – велат од ЛДП. Според ЛДП, посебноста на Македонија мора да биде главната водилка кон прифаќањето каков било предлог за државниот грб. Притоа, тоа мора да биде и решение што ќе ги задоволи сите граѓани на Македонија, без разлика на националната, етничката, партиска, верска или било која друга припадност. – Предлагаме општоприфатливо решение. Бидејќи доколку сите се водиме од своите партиски обележја или позиции, ЛДП би се придржувала до македонската флора и фауна и би предложила поставување на соколот како уникатен македонски симбол и дел од нашиот македонски фолклор. Покрај тоа што во Македонија живеат девет посебни видови соколи, во нашата народна музика со гордост се опева соколот кој пие вода од нашиот Вардар, песна што е и химна на партијата – истакнуваат од ЛДП. „Слободен печат“ веќе објави дека ВМРО-ДПМНЕ и Вреди разговарале за промена на државниот грб. Премиерот потврди дека партиите од владејачката коалиција ВМРО-ДПМНЕ и Вреди го отвориле прашањето за промена на државниот грб. – Ние ова прашање го отворивме. Ние сме една од двете постсоцијалистички држави што сè уште го имаат стариот државен грб, со некои мали модификации – рече Мицкоски.
