Министерот за европски прашања на Република Северна Македонија, Орхан Муртезани, денеска беше домаќин на својот унгарски колега, министерот за ЕУ прашања на Унгарија, Јанош Бока, кој престојува во работна посета на земјава. Во рамките на посетата, Министрите одржаа тет-а-тет средба, по што следеше и пленарна сесија на делегациите, на која се разговараше за клучните прашања поврзани со европската интеграција на Северна Македонија и интензивирање на билатералната соработка во контекст на ЕУ.
Министрите ја реафирмираа заедничката определба за продлабочување на односите меѓу двете земји, особено во доменот на поддршка во пристапниот процес кон Европската Унија. Унгарија, како докажан поддржувач на европските аспирации на Северна Македонија, уште еднаш ја потврди својата подготвеност да го сподели своето искуство и експертиза во евроинтегративниот процес. Муртезани и Бока потпишаа Меморандум за соработка меѓу Министерствата за европски прашања на Северна Македонија и Унгарија, кој поставува основа за долгорочна институционална соработка, размена на искуства, административна поддршка и координација во насока на усогласување со европското законодавство и ефективно користење на европските фондови.
На заедничката прес-конференција, министерот Муртезани исткна: „ Оваа возвратна посета не е само уште еден настан во динамичниот календар на нашите билатерални односи, таа носи во себе силна порака. Порака дека партнерствата се градат преку доследност, доверба и заедничка визија. Северна Македонија и Унгарија се поврзани со длабоки пријателски врски, а билатералната соработка добива уште позасилена динамика. Унгарија одамна ја има нашата благодарност за гласната поддршка за нашиот евроинтегративен пат. Во контекст на Меморандумот за соработка, Муртезани подвлече: „На нашата веќе блиска соработка ѝ даваме институционална димензија и стабилна рамка. Овој документ не претставува само формализирана административна алатка, туку е израз на нашата заемна посветеност за продлабочување на партнерството преку размена на знаење, искуства и заеднички напори кон исполнување на европските стандарди.“
Видео од прес-конференцијата: https://www.facebook.com/share/v/1ARhfjNJNa/
Во продолжение е интегралниот говор на МЕП Муртезани од денешната прес-конференција:
=========================================================================
Почитувани претставници на медиумите, почитуван министер Бока, драги пријатели,
Со особено задоволство сум домаќин на мојот колега, министерот за ЕУ прашања на Унгарија, Јанош Бока, по нашата конструктивна средба во Будимпешта, во септември минатата година. Оваа возвратна посета не е само уште еден настан во динамичниот календар на нашите билатерални односи, таа носи во себе силна порака. Порака дека партнерствата се градат преку доследност, доверба и заедничка визија.
Северна Македонија и Унгарија се поврзани со длабоки пријателски врски, а билатералната соработка добива уште позасилена динамика. Унгарија одамна ја има нашата благодарност за гласната поддршка за нашиот евроинтегративен пат. Особено ја цениме нејзината улога како Претседавач со Советот на Европската Унија, имајќи предвид дека токму за време на Унгарското претседателство со Советот на ЕУ минатата година, прашањето за проширувањето на Унијата и интеграцијата на Западниот Балкан беше ставено високо на приоритетите на претседавањето, а со тоа и на европската агенда.
Министре Бока, драг Јанош, Вашата постојана, гласна и принципиелна поддршка за интегрирањето на Северна Македонија и Западниот Балкан во Унијата што побрзо, е вистински пример за пријателство во пракса. Унгарија докажува дека кога една земја членка на ЕУ верува во политиката на проширување, таа не само што зборува, туку и делува. Денес ние сме сведоци на таа посветеност. Круна на денешните разговори е потпишувањето на Меморандумот за соработка, кој поставува цврста рамка за долгорочно и структурирано партнерство во областа на европските интеграции.
Со потпишувањето на овој Меморандум меѓу нашите Министерства за европски прашања, на нашата веќе блиска соработка ѝ даваме институционална димензија и стабилна рамка. Овој документ не претставува само формализирана административна алатка, туку е израз на нашата заемна посветеност за продлабочување на партнерството преку размена на знаење, искуства и заеднички напори кон исполнување на европските стандарди. Тоа е конкретна потврда дека сме подготвени да учиме едни од други, но и дека заеднички ќе се справуваме со комплексноста на пристапниот процес: од техничките предизвици на усогласување со правото на Европската Унија, до стратегиите за ефективна искористеност на европските фондови, кои се суштински за економски и институционален развој.
Со нашите потписи денеска, изразивме подготвеност Унгарија да го подели своето драгоцено искуство од периодот на нејзините пристапни преговори. Тоа вклучува увид во административните модели, правната хармонизација, механизми за координација меѓу институциите, како и ефективни примери на интегрирана европска политика во пракса. Од наша страна, како Влада која веќе воспоставила структури за координација со тој процес и посветено работи на отворање на кластерите и поглавјата од преговарачкиот процес, ќе го искористиме ова партнерство како дополнителен поттик за забрзување на темпото на нашата интеграција.
Ова не е само техничка соработка, ова е всушност инвестирање во европската иднина на нашите граѓани. Со овој чекор, Северна Македонија и Унгарија уште еднаш покажуваат дека Европа не е само географија или бирократија, туку заедничка цел, заеднички вредности и заедничка увереност дека политиката на проширување е една од најважните стратешки цели на Европската Унија, која што својата привлечност и трансформативна моќ ја црпи токму од обединувањето – како суштински европски концепт на солидарност, заемна поддршка и визија за континент кој не се гради на поделби, туку на поврзувања, вредности и заедничка иднина.
Министре Бока, Ви благодарам во мое и во име на Владата што и овој пат сте со нас; не само физички овде во Скопје, туку и во процесот, во визијата и во поддршката на нашите напори да го забрзаме патот кон ЕУ и да го направиме овој процес поефикасен, поконкретен и со видливи резултати, за нашите граѓани, кои несомнено му припаѓаат на европското семејство.
