Бројот на загинати во разорниот земјотрес во Мјанмар се искачи на 2.886, 4.639 лица се повредени, а 373 сè уште се водат како исчезнати, соопшти денеска информативната служба на владејачката воена хунта. Исто така, беше објавено дека 26-годишен хотелски работник бил спасен денеска од урнатините на хотелот во мјанмарската населба Најпида, пет дена по земјотресот со јачина од 7,9 степени според Рихтеровата скала што ја погоди земјата, јави Ксинхуа.
Две лица останаа заробени под урнатините на хотелот, а спасувачките тимови од мјанмарската и турската противпожарна служба успешно извлекоа еден преживеан на безбедно, соопшти информативниот тим на владата на Мјанмар. Операцијата во хотелот започнала во вторникот околу 15 часот по локално време, а мажот бил спасен околу 00:30 часот по локално време денеска, се вели во соопштението. Во тек се операции за лоцирање и спасување на преостанатите затрупани лица, се додава во соопштението, пренесува Танјуг.
