Секоја драстична промена на цената на нафтените деривати негативно ќе влијае врз цената на превозот, а тоа ќе повлече нови зголемувања на производите од увоз во земјава. Цените на нафтата скокнаа за повеќе од 12 проценти минатата недела на глобалните пазари, достигнувајќи ги највисоките нивоа од крајот на јануари, бидејќи трговците стравуваат од прекини во снабдувањето на Блискиот Исток по нападот на Израел врз Иран.
Цената на барел на лондонскиот пазар скокна за 12,5 проценти минатата недела на 74,25 долари, додека на американскиот пазар барелот се зголеми за 13 проценти на 72,95 долари. Трговците стравуваат за пратките на нафта преку Ормутскиот теснец, низ кој дневно минуваат 18 милиони барели нафта, кондензат и гориво. По силниот скок на цените на нафтата, Меѓународната агенција за енергија (ИЕА) во петокот објави дека ја следи ситуацијата и дека е подготвена да пушти нафта од кризните резерви на пазарот, доколку е потребно, објави „СЕЕ.биз.еу“.
Викендов и претседателот на РКЕ, Марко Бислимовски предупреди дека војната меѓу Израел и Иран ќе има влијанија врз цената на нафтата и во Македонија, оградувајќи се дека не очекува влијание на цените на останатите производи. Тој изрази надеж дека по пикот цените ќе се стабилизираат, посочувајќи го примерот со војната во Украина кога цената на дизелот достигна 110 долари по барел.
– Се надеваме дека ова ќе биде само еден пик и понатаму ќе се стабилизираат цените, како што беше тоа случај кога почна војната во Украина, имаше пик па се стабилизира и во последните неколку месеци тие се движеа меѓу 65 и 68 долари за барел – рече Бислимовски.
Билјана Муратовска, генерална секретарка на Асоцијацијата „Макам Транс“ за „Слободен печат открива дека просечниот годишен трошок за набавеното погонско гориво по возило се движи од 43 до 48.500 евра, при што огромна улога за висината на трошокот за нафтата има инфлацијата, односно нестабилните цени на нафтата во Европа.
-Превозот е услуга која се консумира веднаш и во моментот на случувањето, така што не постои можност да се формира залиха за да се чека поволен период за стабилизација на пазарот, напротив превозниците мора да се снаоѓаат за да опстанат на транспортниот пазар и покрај сите кризи кои први ги чувствуваат. Факт е дека нема гарантирани цени на превоз, во услови на голема конкуренција на европскиот транспортен пазар. Трошокот за погонско гориво е еден од најголемите трошоци на работењето на секое превозно трговско друштво и претставува повеќе од 35 отсто од вкупниот бруто приход на секое друштво – објаснува Муратовска.
Колку сме зависни и ранливи од секоја промена на цените на нафтените деривати, покажува и податокот дека во земјава дури 96 отсто од превозот на стока во внатрешниот и во меѓународниот превоз се врши камионски.
-Порастот на цената на горивата предизвикува ланчана реакција на зголемување на цените на сите производи од кое зголемување, поради вишокот на превозни
капацитети (над 17.000 товарни возила) и изразената голема несоработка меѓу превозниците во однос на изедначени превозни цени за одредени релации, превозниците немаат голема корист, затоа што ретко успеваат да ја зголемат цената на превозот – додава Муратовска.
Горивата поскапеа за 1,50 денари
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 1,50 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 9 јуни и со тоа малопродажната цена на ЕУРОСУПЕР БС-95 изнесува 76,00 ден/лит, малопродажната цена на ЕУРОСУПЕР БС-98 изнесува 78,00 ден/лит, додека малопродажната цена на ЕУРОДИЗЕЛ (Д-Е V) изнесува 67,50 ден/лит, истакна РКЕ.
