Израелскиот премиер Бенјамин Нетанјаху и министерот за одбрана Израел Кац денеска го именуваа пензионираниот генерал-мајор Ејал Замир за нов началник на Генералштабот на израелските одбранбени сили (ИД). Замир се сметаше за водечки кандидат за наследник на началникот на Генералштабот на израелската армија, генерал-полковник Херзи Халеви, кој неодамна поднесе оставка.
Халеви пред десетина дена го информирал израелскиот министер за одбрана дека има намера да поднесе оставка на 6 март. Тој објави дека ја напушта армијата, наведувајќи ги како причина безбедносните пропусти што го дозволија нападот на Хамас на 7 октомври 2023 година.
