Според Банката, овој раст е умерен во однос на истиот период од минатата година, но цените на храната и енергетската компонента и натаму имаат значително влијание врз месечната инфлациска динамика. Извршниот одбор на Народната банка на редовната седница одржана на 11 март 2025 година одлучи да ги задржи каматните стапки непроменети, оценувајќи дека тековната монетарна поставеност е соодветна на економските услови и ризиците кои сè уште постојат. Како што соопшти НБРСМ, главен акцент при носењето на одлуката бил ставен на инфлациските движења и ризиците од глобалното и домашното окружување. Според најновите податоци, просечната инфлација за јануари и февруари 2025 година изнесува 5 отсто. Според Банката, овој раст е умерен во однос на истиот период од минатата година, но цените на храната и енергетската компонента и натаму имаат значително влијание врз месечната инфлациска динамика. „Од друга страна, базичната инфлација останува релативно стабилна, а во февруари е забележано и одредено забавување“, соопшти НБРСМ.
Анкетите на Европската комисија покажуваат дека очекувањата на потрошувачите се насочени кон намалување на цените во наредниот период, но и покрај тоа, остануваат ризици од промените на берзанските цени на примарните производи, кои генерално се движат во нагорна насока. Ова укажува на потреба од внимателност во монетарната политика. Народната банка истакна дека девизниот пазар е стабилен, а девизните резерви на крајот на февруари изнесуваат 4,86 милијарди евра, што е доволно за одржување на стабилноста на курсот на денарот. Економскиот раст во последниот квартал на 2024 година достигна 3,2%, а за целата година просечниот раст беше 2,8%, што е над очекувањата. Во контекст на меѓународните движења, Европската централна банка (ЕЦБ) во март донесе одлука за намалување на каматните стапки за 0,25 процентни поени, под влијание на инфлациските трендови во еврозоната. Народната банка нагласи дека и натаму внимателно ќе ги следи сите ризици и ќе презема соодветни мерки за одржување на ценовната стабилност и стабилноста на девизниот курс на денарот. Извор: Новинска агенција МЕТА
