Во градинките недостигаат и негувателки и воспитувачки, а како што тврдат од Општината, Министерството за социјална политика демографија и млади ниту дава согласност да се примат на работа нови на местото на оние кои заминале во пензија, ниту издава лиценци неопходни за нови вработувања. Во градинките во Карпош во моментов недостигаат 43 негувателки и воспитувачки. Толку во изминативе две години заминале во пензија, а на нивно место не се примени нови. Но, за да се исполни законскиот стандард, покрај нив потребни се уште 60-тина, со кои би се обезбедило нормално функционирање и згрижување на децата.
Од тие причини, градоначалникот на Општината, Стевчо Јакимовски деновиве одржа итен состанок со директорките на градинките, на кој се разговарало за алармантната состојба со недостатокот на негувателки, воспитувачки и технички персонал во градинките. Директорките се пожалиле кај градоначалникот дека бројот на персоналот е под секој минимум, па како последица на тоа е опаднат квалитетот на згрижување на децата, особено во јаслите и нема можност за упис на бебиња затоа што една негувателка треба да се грижи за 25 до 40 доенчиња, што е невозможно. Ситуацијата е отежната и поради тоа што некои од вработените работат само по 4 часа или подолго време се на боледување поради тешки болести или инвалидитет, а како што тврдат од Општината, Министерството за социјална политика демографија и млади не дозволува да заминат во инвалидска пензија и на нивно место да се ангажираат други лица.
Во моментот во градинките во општина Карпош недостигаат 43 негувателки, воспитувачки и технички персонал од оние кои заминале во пензија, наназад две години и за кои немаат добиено одобрение за ново вработување. Оваа бројка е потребна за да се постигне функционален минимум, а не станува збор за исполнување на стандардот на 15 деца да има две негувателки и воспитувач. Зборуваме само за обично згрижување на децата. За да се испочитува стандардот што е по закон треба минимум уште шеесетина негувателки и воспитувачки. Ваквиот неодговорен однос кон детската заштита особено кон општина во која наталитетот се зголемува, трае наназад петнаесет години – вели Јакимовски.
Според него проблем е што се чека „милост“ од министерството да даде согласност, а би требало по автоматизам кога еден вработен во градинка ќе замине во пензија, веднаш да се издаде одобрение за негова замена. Во меѓувреме, нагувателките и воспитувачките „не смеат“ да се разболат или да одат на одмор затоа што едноставно нема кој да ги замени, иако се преморени и со огромна одговорност, обидувајќи се да завршат работа што според закон е предвидена за двајца или тројца. За негувателка или воспитувачка да може да биде ангажирана во градинка мора да има соодветна лиценца, а лиценци не се издаваат речиси три години. Од Општината велат дека овој неодговорен однос не се однесува само на актуелниот министер и на Владата, туку и на министрите и владите претходно и според нив е нејасно како може во општина која има зголемен број на деца во услови на празнење на државата да не се даваат одобренија за вработување за згрижување, воспитување и образование на идните поколенија.
Од Министерството досега нема одговор на прашањата зошто не се дава согласност за вработување негувателки и воспитувачки во градинките во Карпош на местото на оние кои заминале во пензија и кога планираат да спроведат полагање за добивање лиценци. Пред речиси два месеца оттаму информираа дека започнува процесот на полагање за лиценци за работа во детските градинки, откако измената на Законот за заштита на децата ја помина собраниската процедура.
Од октомври 2023 година не се спроведува стручниот испит за стекнување на лиценца за работа во установите за деца, испит кој се однесува на сите кандидати кои сакаат да се вклучат во системот за згрижување и воспитание на деца од предучилишна возраст – посочија тогаш од Министерството.
Токму ова Министерството е надлежно за издавање на лиценците за работа и тоа: лиценца за стручен работник, за стручен соработник, за воспитувач, лиценца за негувател и лиценца за директор. Поседувањето лиценца е неопходен критериум за вработување во градинките.
