НА 33 ГОДИНИ ПОЧИНА ХЕРОЈОТ ОД ПРЕСПА: Јанкула пред секое тргнување упатуваше апел до лицата со хендикеп да бидат силни и храбри
Во 33 година од животот, по тешко боледување, денеска почина Васил Јанкула, познат како Преспански херој, поради неговата цврста волја да покаже дека „сите сме исти“.
Тажната вест ја соопшти градоначалникот на општина Пустец, Пали Колефски, изразувајќи длабоко и искрено сочувство со фамилијата и пријателите, додавајќи дека „Хероите имаат посебно место кај Бога“.
-Нашиот Васил -Преспанскиот херој, прерано не напушти. Васил, сите нас не научи дека не постојат пречки што не можат да се надминат, дека со посветеност и љубов секој успех е дофатлив. Васил беше, е и ќе остане инспирација за сите што животот им приредил потешкотии но и за сите што го познавале или слушнале за него. Хероите никогаш не умираат, така и Васил нашиот херој. Преспанскиот херој, со својот животен пат, ќе остане да живее во сеќавањата и срцата наши, со своите подвизи ќе ги инспирира и идните генерации. Вечна слава хероју и светол да ти е патот, напиша Колефски во објава на Фесбук.
Јанкула е по потекло од селото Туминец, општина Пустец, Мала Преспа, но со семејството живееше во Ресен. Од раѓање се соочуваше со болеста церебрална парализа, но никогаш не се предаде, со трицикл возеше на многу дестинации и на маратони.Пред секое тргнување тој упатуваше апел до сите лица со хендикеп да бидат силни и храбри и да не се откажуваат на пола пат, секогаш под мотото „Сите сме исти“. Тој организираше и хуманитарни активности.
