Објава на Фејсбук се обидува да го дискредитира советникот на Општина Кочани и нејзин можен в.д. градоначалник, Венко Крстевски, неосновано припишувајќи му некаков сатанизам. Во објавата е прикажан колаж од две слики: цртеж од митското суштество Бафомет, кое најчесто се поврзува со сатанизмот и фотографија од Крстевски, на која, како што сугерира објавата, тој носи маичка со симболика која има врска со споменатиот цртеж, но цврст доказ за таа поврзаност не е понуден. Вистиномер рецензираше објава на социјалната мрежа Фејсбук, во која се наведува: “Ѓаволот (Сорос) ни ора ни копа”. Колку и да се трудите, сепак некоја ситница ќе ви избега и ќе си го покажите правото лице. Повторно сакаат да нѐ ‘превеслаат жедни преку вода’. Тоа е илустрирано со колаж од две слики. Едната (поставена десно), е цртеж од митското суштество Бафомет, кое личи на ѓавол и кое најчесто се поврзува со сатанизмот, а другата (поставена лево), е фотографија од независниот советник на Општина Кочани, Венко Крстевски, за кого медиумите јавуваат дека можеби ќе стане нејзин в.д. градоначалник. На фотографијата, која е со лоша резолуција, тој носи маичка со некаков цртеж и натпис, кои не се баш разбирливи, но ние успеавме да ги идентификуваме. Всушност, тоа е скриншот од еден напис на интернет во врска со Крстевски.
Авторот на колажот со црвена боја го заокружил ликот на Бафомет, но и цртежот на маичката на Крстевски, сугерирајќи со тоа дека тие два цртежи се исти или дека меѓу нив има некаква поврзаност, т.е. дека Крстевски носи маичка со Бафомет или нешто слично и дека е негов поклоник или сатанист. Крстевски, според објавата, се обидува да го сокрие тој факт, но носејќи ја таа маичка тој несакајќи си го открил своето вистинско лице.
Колажот е можеби намерно направен во лоша резолуција за јавноста да не забележи што точно има на маичката на Крстевски, но ние ја најдовме таа негова фотографија во добра резолуција.
Ја најдовме и маичката во две онлајн-продавници (тука и тука), а на неа не е претставен Бафомет, туку следниве содржини. На неа пишува: ARMANI EXCHANGE ROCKS Тука се мисли на италијанската модна куќа Armani, која е позната по луксузната облека, но Armani Exchange е нејзина поповолна модна линија или модна колекција во т.н. кежуал или понеформален стил. Овој натпис звучи како рекламен слоган за неа и тој порачува дека таа колекција „рока“, односно дека е „кул“, дека е јака, возбудлива или сл. Тоа нема врска со Бафомет или со сатанизам, а оваа модна куќа дури има изработувано облека за католичката црква, по нарачка на бискупот Доменико Могаверо. Тој позитивно се изразува за таа модна куќа, а нејзиниот основач, Џорџо Армани, е почесен доктор на науки на Католичкиот универзитет во Милано, во сферата на бизнис-менаџментот. Кога на маичката е веќе споменато „рокање“, прикажана е и дланка, на која се исправени показалецот и малиот прст, што е гестикулирање типично за рок-концертите, особено за хеви-металот. Поединци овој правец во рокенролот го поврзуваат со сатанизмот, а таа гестикулација им личи на ѓаволски рогови, но хеви-метал музичарот Рони Џејмс Дио, кој ја популаризирал гестикулацијата, вели дека ја презел од неговата суеверна баба по потекло од Италија.
Низ Медитеранот, таа гестикулација служи за одбрана од уроци, а слични гестикулации има и во будизмот за одбрана од негативна енергија. Таа гестикулација се среќава во разни култури, а може да биде и навредлива и да порачува некому дека е „рогоносец“, т.е. дека партнерот/ката го мами со друг. Навистина, има и такви, кои ја користат во сатанистичка конотација, но објавата не нуди доказ дека тоа е така кај Крстевски. Според неговото презиме, кое можеби има врска со зборот крст, неговите предци се веројатно од христијанска вероисповест, но за неговите верски убедувања не знаеме ништо и можеме само да нагаѓаме, а објавата (и маичката во неа) за тоа не дава одговор. Во неговиот фејсбук-профил не најдовме сатанизам, туку главно политички и спортски содржини. На крајот на објавата е вметнат жолт емотикон, кој „намигнува“ , па може да се помисли дека објавата е само шега или сатира, но тоа не е така. За тоа сведочат коментарите под објавата оставени од нејзиниот автор, во кои се вметнати и други колажи со разни обвинувања за Крстевски, па сево ова ни кажува дека тука станува збор за обид за негова политичка дискредитација.
Крстевски се споменува во медиумите како можен в.д. градоначалник на Општина Кочани, откако нејзиниот доскорешен градоначалник Љупчо Папазов даде оставка по смртоносниот пожар кој избувна во тамошниот ноќен клуб Пулс на 16.3.2025 г. Земајќи го предвид сето досега наведено, објавата ја оценуваме како невистинита. Извор: Новинска агенција МЕТА
