Никој не сака оброк „зачинет“ со стакленца, метални парчиња и пластика – Операторите со храна мора да внимаваат на производниот процес

Зачестеното присуство на стаклени, метални и други остатоци на кои не им е место во храната е последица на невнимателноста на операторите со храна во процесот на производство. Оливер Миланов, директор на Агенцијата за храна и ветеринарство, вели дека е очигледно дека не се внимава доволно во производствениот процес, па оттука и има вакви честички кои може да го загрозат здравјето на граѓаните. Од лани во јуни досега, АХВ, одзела и уништила околу 300 тони небезбедна храна, а само годинава дури 56 тони. Извршени се и 12 илјади инспекции само во внатрешниот промет, а за утврдените недоследности изречени се 1.325 мерки, од кои 260 парични казни и времени забрани за вршење дејност, а поднесени се и прекршочни пријави.

-Дополнителни се контролите кои се вршат за секоја пратка која се увезува во земјава и за досега како небезбедни вративме 10 пратки, најголемиот дел поради увоз од забранети региони/држави. Уништена е една пратка со храна од животинско потекло со тежина од 207 тони, а како небезбедни уништени се и околу 30 тони храна од неживотинско потекло, повеќе од половината небезбедна минерална вода од увоз, поради бактериолошка загаденост, недоволна јодираност на сол и утврдени остатоци од пестициди во зеленчук – набројува Миланов.

Генерално, според директорот на АХВ, во светот не постои храна која е стопроцентно безбедна, но македонските граѓани јадат релативно добри и неотровни прехранбени производи. Сепак, тие сигнализираат за проблеми поради непочитување на добрата хигиенска практика и ХАСПП стандардите, но се жалат и на продажбата на производи со поминат рок на употреба, на работа без одобрение, присуство на контаминенти во производите, сомнеж за труење со храна, нагмечена амбалажа и на производи со променети органолептички својства.Директорот Миланов вели дека врз операторите со храна паѓа и одговорноста за уништување на храната со поминат рок на траење и таа никако не смее повторно да се врати на пазарот.

-Операторите со храна, иако имаат обврска за безбедно уништување на храната со поминат рок на депонијата Дрисла, најчесто не се придржуваат до законот. Постојано вршиме контроли и ги молиме граѓаните да нè алармираат доколку купат некој таков производ – посочува Миланов.

Светскиот ден за безбедноста на храната (7 јуни), АХВ го одбележува акцентирајќи ја важната улога на науката во креирањето и носењето на одлуки за храната како информирани потрошувачи.

-Не треба да заборавиме дека повеќе од 600 милиони луѓе во светот се разболуваат од небезбедна храна, а за нивно лекување се трошат околу 15 милијарди долари. За жал, од небезбедна храна луѓе и умираат, а нивниот број во светот годишно се движи околу 420 илјади. Еден од десет луѓе ширум светот се разболуваат од контаминирана храна секоја година, а повеќе од 200 болести се предизвикани од консумирање небезбедна храна која е контаминирана со бактерии, вируси, паразити или хемиски супстанции како што се тешките метали. Овие бројки може да се спречат само кога безбедноста на храната е приоритет по синџирот на исхрана секаде во светот. Опасностите од небезбедна храна се реалност, тие не познаваат граници и се дел од големиот синџир за снабдување со храна – објаснува Миланов.

И Македонија нема да увезува пилешко месо од Бразил

И во земјава нема да се увезува пилшеко месо од бразилската сојузна држава Рио Гранде, соопшти директорот на АХВ. Пред две недели истото го стори и Косово, а причината е појавата на птичјиот грип, а забрана за увоз на бразилно пилешко месо воведоа и ЕУ и Кина. Птичјиот грип е многу заразна вирусна болест, која првенствено ги погодува птиците и, во ретки случаи, може да се пренесе на луѓето.Од АХВ информираат и дека се воведени мерки на засилен надзор на болеста чума кај малите преживари, особено во регионот на Западна Македонија, за да се спречи внес и ширење на болеста од соседна Албанија во земјава. Светската организација за здравствена заштита на животните, сигнализираше дека во Република Албанија во областа Дебар, во место Кастриот, на фарма со 200 кози има појава на ново жариште на болеста, по пријавата на првиот случај во Скадар.