Соединетите Американски Држави се обидуваат да ја преземат контролата врз клучните минерални и енергетски ресурси на Украина со нов нацрт-договор, без да понудат безбедносни гаранции за Киев во замена, што претставува значителна ескалација на претходните барања. Нацрт-договорот, доставен до Киев минатиот викенд и разгледан од Фајненшл Тајмс, значително ги надминува условите на претходниот економски договор постигнат минатиот месец. Овој договор е дел од напорите на американскиот претседател Доналд Трамп да се стави крај на руската инвазија на Украина, а исто така и да се вратат милијарди долари испратени како воена помош.
Според нацртот, договорот ќе ги опфати сите минерални ресурси на Украина, вклучувајќи нафта и гас, како и клучни енергетски капацитети. Во него се предлага формирање на надзорен совет помеѓу Украина и САД, кој ќе управува со заеднички инвестициски фонд.
Приходите од украинските проекти за нафта, гас и рударство ќе бидат поделени, при што САД ќе имаат мнозинство во Советот и правото на вето. Меѓутоа, некои украински функционери го критикуваат договорот. Првиот вицепремиер Јулија Свириденко изјави дека владата на Украина работи на тоа да договорот ги одразува нивните интереси и да биде во согласност со стратешкото партнерство со САД. Договорот треба да биде одобрен од украинскиот парламент. Овој нов договор ќе го замени претходниот рамковен договор за развој на минералните ресурси, кој беше откажан по пропаѓањето на средбата помеѓу Трамп и Зеленски. Се очекува дека новиот предлог ќе вклучува проекти за инфраструктура поврзани со експлоатација на природни ресурси, а приходите од нив ќе се испраќаат во странство. САД ќе имаат право на вето за продажбата на ресурси на трети земји, што може да има значителни геополитички импликации. „Овој договор е преседан“, изјави Алан Рајли, експерт за енергетско право. „Никогаш досега не сум видел вакво нешто“.
