Си-Ен-Ен ги објави новите околности околу падот на туристичкиот хеликоптер кој во четвртокот се урна во реката Хадсон кај Менхетен, при што загинаа шест лица, три деца, нивните родители и пилотот. Станува збор за шпанско семејство вработено во Сименс кои биле на одмор во Њујорк, а летот бил дел од роденденското изненадување. Хеликоптерот полета од центарот на Менхетен, ја обиколи Статуата на слободата и се упати по реката Хадсон. Само 16 минути по полетувањето, се урнал во близина на брегот на Њу Џерси. Сведоците опишаа како хеликоптерот одеднаш изгубил контрола, се свртел и паднал во водата наопаку. На снимката се гледа и како роторот се одвоил од трупот на хеликоптерот неколку секунди пред падот.
Загинати се Агустин Ескобар (49), директор во Сименс Мобилити, неговата сопруга Мерсе Кампруби Монтал, менаџер во Сименс Енерџи и нивните три деца – момчиња на возраст од 4 и 11 години и ќерка која требаше да наполни девет години следниот ден. Пилотот, 36-годишниот Сенекес Џонсон, бил поранешен припадник на специјалните сили на САД и искусен летач. Градоначалникот на Њујорк Ерик Адамс положи цвеќе на местото на несреќата и рече дека градот е во жалост: „Нивната болка е наша“. Националниот одбор за безбедност на транспортот (NTSB) потврди дека хеликоптерот немал рекордери за летот или видео опрема, што ја комплицира истрагата. Авионот Bell 206L-4 е произведен во 2004 година, а во последните две години FAA издаде неколку предупредувања за можни технички проблеми поврзани со роторот и погонот, но не е јасно дали тие се поврзани со оваа несреќа.
Компанијата што управува со хеликоптерот веќе имала две несреќи во минатото – во 2010 година во Чиле и во 2013 година во Њујорк, кога хеликоптерот принудно слетал во река. Поради оваа трагедија, повторно се отворени прашањата за безбедноста на туристичките летови над Њујорк. Некои политичари бараат забрана на овие летови, како и привремена итна забрана за летови од градските хелиодроми додека истрагата е во тек, додека претставниците на индустријата апелираат на претпазливост и ги отфрлаат општите забрани. Истрагата е во тек, а НТСБ бара дополнителна снимка и сведочење на граѓаните. Од реката се уште се извлекуваат делови од хеликоптерот, а причината за несреќата се уште не е позната.
