26-годишниот Луиџи Манџоне, кој е обвинет за убиството на извршниот директор на американскиот фонд за здравствено осигурување „ЈунајтедХелткер“, Брајан Томпсон, денес пред федералниот суд во Њујорк се изјасни како невин по обвиненијата за убиство и демнење, јавија американските медиуми. Тој се појави пред федералната судијка Маргарет Гарнет и за време на сослушувањето кратко разговараше со своите адвокати и одговараше на прашањата на судот само со едносложни зборови. Насилниот чин за кој е обвинет Манџоне предизвика бран од неочекувани реакции во американското општество и цело движење посветено на неговото ослободување. Приврзаниците на момчето велат дека убиениот директор на „ЈунајтедХелткер“, Томпсон, со политиките на неоправдано одбивање на здравствено осигурување, е виновен за смртта на илјадници Американци.
Доколку биде осуден, Манџоне може да се соочи со смртна казна. Неговите адвокати сè уште не дале коментар за случајот. Во преполната судница беше и поранешната американска воена аналитичарка и „свиркач“ Челси Менинг, која претходно изрази поддршка за Манџоне. Против Манџоне минатата недела беше подигнато федерално обвинение по четири точки, меѓу кои две точки за следење, убиство со огнено оружје и нелегална употреба на придушувач. Тој е обвинет дека го застрелал директорот Томпсон во грбот на 4 декември 2024 година, на тротоар пред хотел на Менхетн каде што убиениот менаџер присуствувал на инвестициска конференција. На местото на злосторството се пронајдени две чаури со врежани зборови „одложи“, „негирај“ и „отстрани“. Зборовите „негирај“, „отфрли“ и „одложи“, врежани на чаурите на местото на злосторството, се однесуваат на тактики што често им се припишуваат на американските осигурителни компании (отфрлање или негирање на валидноста на барањата, одложување на плаќањата и отстранување на одговорноста), што му дава на нападот симболичен карактер насочен против здравствениот систем.
По петдневна потера, Манџоне беше уапсен во „Мекдоналдс“ во Алтуна, Пенсилванија, каде што вработен во ресторанот го препознал и ја известил полицијата. Еден ден пред сослушувањето, федералните обвинители формално поднесоа барање за смртна казна, повикувајќи се на директива од министерката за правда Пем Бонди, која пред неколку недели објави дека случајот ќе се третира како особено сериозно кривично дело со политички елементи. Во предлогот за смртна казна се наведува дека Манџоне „намерно го убил Томпсон со цел да предизвика широко распространето социјално противење кон здравствената индустрија“ и дека тој претставувал „идна опасност“ бидејќи „изразил намера да ја таргетира целата индустрија преку чинови на смртоносно насилство“. Обвинителите тврдат дека веднаш по злосторството, Манџоне се обидел да избега од полицијата, избегал од Њујорк, ги преминал државните граници вооружен со нелегално произведен пиштол и придушувач и користел лажни документи. Манџоне се соочува и со обвиненија во државните судови во Њујорк и Пенсилванија, вклучувајќи убиство во контекст на терористички акт, две точки за убиство од втор степен, поседување оружје и фалсификување. Тој се изјасни за невин и по обвиненијата за убиство и тероризам во Њујорк.
